Rrjeti i Reagimit të Shpejtë për çështje të Lirisë së Medias, i përbërë nga tetë organizata të mëdha shqiptare dhe ndërkombëtare, i kërkoi autoriteteve shqiptare të respektojnë fshehtësinë e burimeve, në një letër drejtuar autoriteteve shqiptare dhe partnerëve ndërkombëtarë.
Organizatat bënë të ditur se janë të alarmuara nga vendimi i gjykatëses Iliriana Olldashi, e cila miratoi kërkesën e prokurorisë për sekuestrimin e pajisjeve të gazetarëve në kërkim të burimit që rrodhi në media lajmin për ekzistencën e një databaze masive që dyshohet se i përket Partisë Socialiste dhe që duket se përdoret për të shënjestruar votuesit një më një përmes përdorimit të të dhënave personale të grumbulluara pa lejen e qytetarëve.
“MFRR është alarmuar nga veprimet e fundit të cilat targetojnë punonjësit e mediave dhe burimet e gazetarëve në Shqipëri. Këto veprime përbëjnë një kërcënim serioz drejtuar të drejtës së publikut për t’u informuar dhe aftësisë së gazetarëve për t’i mbrojtur burimet e tyre,” thuhet në deklaratë.
“Kjo nuk është në përputhje me të drejtën dhe standardet evropiane dhe duhet të adresohet menjëherë dhe në mënyrën e duhur nga të gjitha institucionet shtetërore kombëtare dhe lokale,” vijon më tej deklarata, e cila është firmosur nga organizatat: ARTICLE 19, Association of Professional Journalists of Albania (APJ Albania), European Centre for Press and Media Freedom (ECPMF), European Federation of Journalists (EFJ), Free Press Unlimited, International Press Institute (IPI), League of Journalists of Albania dhe OBC Transeuropa.
Siç raportohet nga një numër mediash shqiptare, dyshohet se Partia Socialiste ka një databazë e cila përmban emrat e 910,000 votuesve në rajonin e Tiranës, së bashku me të dhënat personale, duke përfshirë të dhënat e punësimit dhe të sfondit familjar.
“Kjo është një çështje e cila përbën interes të konsiderueshëm publik sidomos përpara zgjedhjeve parlamentare,” thuhet në deklaratë.
Të enjten, Gjykata Evropiane e të Drejtave të Njeriut vendosi të urdhërojë Shqipërinë të mos zbatojë vendimin kontrovers të gjyqtares Iliriana Olldashi për sekuestrimin e pajisjeve të Lapsit, në një masë pezullimi që është përdorur rrallë dhe vetëm në raste ekstreme nga kjo gjykatë.
Letra i është dërguar kryeministrit Edi Rama dhe kryebashkiakut Erion Veliaj dhe thekson se klima në të cilën punonjë gazetarët është sakaq e rënduar dhe përmend në veçanti rastet e dhunës ndaj gazetarëve Isa Myzyraj dhe Ronaldo Sharka nga mbështetësit e kryetarit të bashkisë Erion Veliaj.
Letra i është drejtuar për dijeni komisionerit të BE-së për zgjerimin Olivér Várhelyi, komisioneres së lartë të Këshillit të Europës për të drejtat e njeriut Dunja Mijatovic e zyrtarëve të tjerë ndërkombëtarë.
Link: Letra
