Policia njoftoi fillimin e procedimit penal në gjendje të lirë ndaj kandidatit të PD-së, pasi ai deklaroi se çdo person i dyshimtë do e pësonte “njëlloj si ai i Elbasanit”, duke iu referuar vrasjes së Pjerin Xhuvanit. Mziu shprehu pendesë pas deklaratës.
Policia e Dibrës njoftoi të premten nisjen e procedimit penal në gjendje të lirë ndaj kandidatit të Partisë Demokratike Xhelal Mziu pas një deklaratë të tij para mbështetësve që sipas saj nxit dhunë.
Në një takim elektoral Mziu deklaroi se PD kishte ngritur grupe të gatshme për të mbrojtur votën. Më pas duke iu referuar ngjarjes në Elbasan në të cilën u vra Pjerin Xhuvani, një politikan lokal i lidhur me Partinë Socialiste, Mziu shtoi se kështu do e pësonte çdo person i dyshimtë. “Nga sot dhe në vazhdim, çdo person i dyshimtë që lëviz në lagjet tuaja, mjafton një telefonatë dhe do ta pësojë njëlloj si ai i Elbasanit”, tha ai në video që u transmetua në Facebook.
Policia ka njoftuar se ka nisur procedimin penal për deklaratën e Mziut dhe materialet hetimore janë referuar në Prokurorinë e Rrethit Gjyqësor Dibër, për veprën penale “Thirrjet për armatosje ose marrje të padrejtë të komandës”. “Kjo pasi gjatë një takimi elektoral në territorin e bashkisë Dibër, shtetasi XH.M, ka kërcënuar dhe ka bërë thirrje për të nxitur dhunë duke bërë prezent ngritjen e grupeve të gatshme me pretendimin e mbrojtjes së votës.” thuhet në deklaratën e DVP Dibër.
Pasi fjala e tij u bë virale në rrjetet sociale dhe u shpërnda në media, Mziu thirri një konferencë për shtyp në të cilën kërkoi ndjesë. “Me sinqeritetin më të madh, shpreh keqardhjen time dhe pendesën time për komentin tim të panevojshëm dje, për shkak të emocioneve të forta të momentit”, tha ai.
Ai pretendoi se mbështeste zgjedhjet e lira dhe të ndershme dhe se ishte kundër dhunës. “Jam penduar thellë”, tha Mziu.
Ndjesa dhe pendesa e Mziut u përshëndetën nga Ambasada Amerikanë në Tiranë, që kërkoi që ngjarja e Elbasanit të mos përsëritej. “Mirë të shohësh ndjesë të qartë nga Dibra. Dhuna e shkaktuar në Elbasan këtë javë nuk mund të justifikohet, nuk duhet të përsëritet”, tha Kim.
Ambasadorja po ashtu kërkoi që partitë politike të mos angazhonin grupe të armatosura, për të patrulluar rrugët, duke i quajtur “një e kaluar e shëmtuar që të gjithë duhet ta refuzojmë.”
Megjithatë deklarata e Mziu u shumëfishuar nga socialistët që e panë atë si konfirmim të akuzave të tyre gjatë këtyre ditëve, pas ngjarjes së rëndë të Elbasanit. “Kush vjen në pushtet duke vrarë, dhunuar e kërcënuar edhe pushtetin e ushtron duke vrarë, dhunuar e kërcënuar!”, shkroi kryeministri Edi Rama duke iu referuar deklarimeve të Mziut.
Të enjten në Dibër mbështetës të PD dhe kandidatë të saj për deputetë ndaluan një makinë, në të cilën u gjetën lista votuesish, 500 mijë lekë dhe broshura të kandidatit të PS Melaim Damzi. Dy persona, përfshi një drejtor të bashkisë Bulqizë, të kontrolluar nga PS u arrestuan me dyshimin se po blinin vota. Në një deklaratë për mediat PS e Dibrës pretendoi se blerësit e dyshuar nuk ishin të saj, por të LSI. Të arrestuarit kanë këmbëngulur se ishin të pafajshëm.
