Gjykata e Posaçme e Apelit rrëzoi vendimin për të sekuestruar mjetet kompjuterike dhe telefonat e gazetarëve dhe drejtuesve të redaksisë së Lapsi.al, pas publikimit të databazës së ‘patronazhistëve’ me të dhënat personale të 900 mijë qytetarëve të Tiranës.
Gjykata e Posaçme e Apelit kundër Korrupsionit dhe Krimit të Organizuar njoftoi të enjten se kishte rrëzuar vendimin e Shkallës së Parë për të sekuestruar kompjutera e telefona celularë të redaksisë Lapsi.al, pas publikimit të lajmit mbi një databazë të përdorur nga Partia Socialiste për të identifikuar dhe gjurmuar preferencat politike dhe të dhëna të tjera për mbi 900 mijë zgjedhës në Tiranë.
“Gjykata e Posaçme e Apelit për Korrupsionin dhe Krimin e Organizuar, mbi ankimin e paraqitur përkundrejt vendimit nr. 131, datë 18.04.2021, të Gjykatës së Posaçme të Shkallës së Parë për Korrupsionin dhe Krimin e Organizuar është disponuar për: “shfuqizimin e vendimit nr.131, datë 18.04.2021 të Gjykatës së Posaçme të Shkallës së parë për Korrupsionin dhe Krimin e Organizuar,” njoftoi Apeli. Argumentet e vendimit nuk janë zbardhur ende.
Vendimi vjen pas një vendimi të Gjykatës së të Drejtave të Njeriut në Strasburg, që urdhëroi në një procedurë që merret vetëm në raste ekstreme, pezullimin e ekzekutimit të kërkesës së prokurorisë.
Vendimi i Gjykatës së Posaçme për të miratuar një kërkesë të SPAK për sekuestrim të kompjuterëve, celularëve dhe çdo pajisje elektronike të redaksisë së Lapsi.al, u pa nga ekspertë të jurisprudencës mbi mediat si përpjekje për frikësim të gazetarëve dhe shkelje e drejtave të njeriut.
Drejtuesit e Lapsit akuzuan prokurorinë se nuk po hetonte shkeljen e privatësisë së mijëra qytetarëve, por po përpiqej të zbulonte burimin që kishte rrjedhur informacionin për databazën te Lapsi.al.
Avokati i Lapsit në këtë çështje, Dorian Matlija i tha BIRN se: “ky është një vendim i mirë që tregon reflektim edhe mbi standardet ndërkombëtare edhe mbi jurispudencën e Gjykatës së Strasburgut”. Matlija tha se çështja kryesore e debatuar në gjykatë ishte se kur prokuroria mund të kërkonte një material, që mund të zbulojë burimin e gazetarëve.
Ai tha se ligji shqiptar dhe Gjykata e Stasburgut lejojnë që kjo të bëhet vetëm kur është e domosdoshme dhe kur prokuroria nuk ka asnjë mundësi tjetër për të hetuar çështjen.
Një sërë organizatash të të drejtave të njeriut, organizata të mbrojtjes së lirisë së medias dhe sëfundmi edhe Komiteti për Mbrojtjen e Gazetarëve, CPJ, një organizatë ndërkombëtare për lirinë e medias, reaguan ashpër ndaj vendimit dhe i kërkuan SPAK të tërhiqej.
“Është me rëndësi jetësore që gazetarët të jenë në gjendje të mbrojnë burimet e tyre konfidenciale dhe autoritetet shqiptare duhet ta respektojnë këtë shtyllë mbajtëse të lirisë së shtypit,” deklaroi dy ditë më parë Gulnoza Said, koordinator i CPJ për Europën dhe Azinë Qendrore.
