Gjykata e Posaçme rrëzoi vendimin e SPAK për mosfillim hetimesh për anëtarin e Këshillit të Lartë Gjyqësor Alban Toro dhe urdhëron prokurorinë të regjistrojë procedim penal për “falsifikim dokumentesh”.
Gjykata e Posaçme rrëzoi të mërkurën vendimin e SPAK për mosfillim të hetimeve ndaj anëtarit të Këshillit të Lartë Gjyqësor Alban Toro dhe urdhëroi prokurorinë të regjistrojë procedim penal për “falsifikim dokumentesh”.
Toro është paditur në SPAK nga avokati Ndue Pjetra drejtues i Shoqatës së Avokatëve Antikorrupsion, me pretendimin se nuk plotësonte kriterin e pasjes së eksperiencës së mjaftueshme të punës si avokat për të qenë anëtar i KLGJ-së. SPAK vendosi mosfillimin për çështjen duke mos gjetur vepër penale në pretendimet e kallëzuesve.
Por pas ankimit të Pjetrës në Gjykatën e Posaçme kjo e fundit urdhëron SPAK të regjistrojë procedimin penal për falsifikim dokumentesh dhe të nisë hetimet ndaj Toros. Anëtari i KLGJ-së nuk iu përgjigj një pyetje për koment deri në publikimin e këtij shkrimi.
Për një akuzë të ngjashme Gjykata e Posaçme dënoi në dhjetor të vitit të kaluar anëtarin e Kolegjit të Posaçëm të Apelimit Luan Daci. Vendimi ndaj Dacit u konfirmua edhe në Apel.
