Gjykata e Posaçme për Korrupsionin dhe Krimin e Organizuar ka vendosur të pranojë si të drejtë akuzën e ngritur nga SPAK ndaj Zamira Ramit “për shpërdorim detyre”. Gjykata e dënoi atë me 8 muaj burgim të zëvendësuar me 120 orë punë në interes publik.
Gjykata e Posaçme e Shkallës së Parë për Korrupsionin dhe Krimin e Organizuar njoftoi të enjten vendimin për shpalljen fajtore të ish-kryetares së Bashkisë Gjirokastër, Zamira Rami për veprën penale “shpërdorim detyre”, pasi u akuzua për prishjen e objekteve me leje gjatë realizimit të projekteve publike, njëra prej të cilave i përket programit të Rilindjes Urbane.
Sipas koordinatores për të drejtën e informimit në Gjykatën e Posaçme, Dinora Aleksi, ish-kryebashkiakja Rami u dënua me 1 vit burgim dhe në aplikimin e gjykimit të shkurtuar, me masën përfundimtare të dënimit, 8 muaj heqje lirie.
Gjyqtarja Iliriana Olldashi ka urdhëruar pezullimin e ekzekutimit të vendimin me burgim dhe zëvendësimin e tij me 120 orë punë në interes publik brenda afatit 6 mujor, me kusht që mos kryejë vepër tjetër penale, si dhe të mbajë kontakte me Zyrën Vendore të Shërbimit të Provës në Gjirokastër.
E kontaktuar nga BIRN, Rami tha se nuk kishte asnjë prononcim lidhur me vendimin. “Kur të përfundojë gjithë beteja ligjore atëherë do të jap qëndrimin tim”, pohoi ajo gjatë një komunikimi telefonik.
Rami u akuzua nga Prokuroria e Posaçme kundër Korrupsionit dhe Krimit të Organizuar, SPAK se, në kundërshtim me ligjin, ka kryer veprime që kanë sjellë prishjen e dy pronave private gjatë realizimit të dy projekteve, një prej të cilave në kuadër të Rilindjes Urbane.
Sipas SPAK, shkeljet janë kryer gjatë zbatimit të projektit për ‘Rikonstruksionin e rrugës Kryqëzim me rrugën nacionale (Postbllok) – Sheshi i Çerçizit’ si dhe për ‘Rikualifikimin e hapësirave publike dhe rrugës hyrëse pranë Memorialit të Rilindasve në Gjirokastër’.
Si pasojë e shkeljeve u prishën dy prona të ligjshme të shtetasve Dritan Sako dhe Teodorti Xhai, që sipas SPAK u ka shkaktuar atyre një dëm pasuror në vlerë 5 milionë e 600 mijë lekë.
Projekti i ‘Rikualifikimit të hapësirave publike pranë Memorialit të Rilindasve në Gjirokastër’ është financuar nga Komiteti i Zhvillimit të Rajoneve në mars 2016 në kuadër të Rilindjes Urbane.
Në vitin 2019, pronarët e banesave të prishura, për shkak të zbatimit të dy projekteve denoncuan Ramin në Prokurorinë e Gjirokastrës për “shpërdorim detyre”, duke pretenduar se nuk ishin dëmshpërblyer. Më pas dosja u transferua për kompetencë në SPAK.
Zamira Rami u zgjodh në krye të bashkisë Gjirokastër në vitin 2015 si përfaqësuese e Lëvizjes Socialiste për Integrim me 54.47 % të votave. Pas vendimit të opozitës për të bojkotuar zgjedhjet lokale të 2019, Rami nuk kandidoi për një mandat të dytë.
