Gjykata e Posaçme e Apelit për Korrupsionin dhe Krimin e Organizuar vendosi të lërë në fuqi vendimin e shkallës së parë për Arbër Çekajn, Donald Lushajn dhe Armando Pezakun, të akuzuar për trafikim droge nga Amerika Latine. Përfaqësuesi ligjor i Çekajt, Maksim Haxhiaj e cilësoi vendimin të pabazuar në prova dhe në shkelje të të drejtave të njeriut.
Gjykata e Posaçme e Apelit për Korrupsionin dhe Krimin e Organizuar vendosi të premten të lërë në fuqi vendimin e shkallës së parë për deklarimin fajtor të biznesmenit Arbër Çekaj, si dhe dy të pandehurve të tjerë si bashkëpunëtorë të tij në trafikimin e 613 kilogramëve kokainë në shkurt të vitit 2018. Vendimi u mor nga trupi gjykues i kryesuar nga gjyqtari Dhitmitër Lara, me anëtare gjyqtaret Saida Dollani dhe Valdete Hoxha.
Më 15 shtator 2020, Gjykata e Posaçme e Shkallës së Parë vendosi dënimin përfundimtar të të pandehurit Arbër Çekaj me 14 vjet heqje lirie; për Donald Lushajn dënimin me 10 vjet e 8 muaj burgim dhe 8 vite e 8 muaj burg për Armando Pezakun.
Pas shpalljes së vendimit nga Apeli i Gjykatës së Posaçme, përfaqësuesi ligjor i të pandehurit Arbër Çekaj, avokati Maksim Haxhia e cilësoi dënimin të pabazuar në prova dhe në cënim të të drejtave të njeriut.
“Është për të ardhur keq që kjo gjykatë është kthyer në një gjykatë noter të prokurorisë. Është për të ardhur keq perspektiva e mbrojtjes së të drejtave të njeriut në procesin në procesin penal, shkelet me të dy këmbët, […]. Është një gjykatë që dënoi një njeri…, po flas për kilentin tim, pa asnjë provë. Dhe jo vetëm kjo, por nuk mori në konsideratë dhe nuk i dha as të drejtën që të mbrohej në konkluzione përfundimtare”, pohoi Haxhia për mediet.
Policia shqiptare sekuestroi sasinë më të madhe të kapur ndonjëherë me kokainë në portin e Durrësit në 28 shkurt 2018, në një konteiner me banane që vinte nga Amerika Latine. Droga ishte e ndarë 528 në pako të ndryshme ku çdo pako kishte shënime të ndryshme dalluese, të tilla si “KE”, “020”, “CR77”, “Toni Montana”, “Molle 3”, “777” etj., duke sugjeruar praninë e një sindikate të krimit me pjesëmarrje të grupeve të ndryshme kriminale. Ajo u sekuestrua në atë që policia e shpalli se ishte një kontroll rastësor pas identifikimit të një anomalie në formën e konteinerit të vërejtur në skaner.
Ndërsa policia shqiptare u lavdërua për suksesin, pikëpyetje u ngritën mbi faktin se pse operacioni u ndërpre në mjediset e kompanisë Arbri Garden dhe nuk u gjurmua droga në vazhdimësi për të gjetur porositësit e saj. Sasia e madhe vuri në pah shkallën e sofistikimit të krimit të organizuar shqiptar si dhe fuqinë e tij financiare pasi blerja e një sasie të tillë droge kërkon investim paraprak prej miliona eurosh.
Prokuroria konsideron Arbër Çekajn, 40 vjeç, pronarin e kompanisë së importit të bananeve, si “personi përgjegjës që ka marrë pjesë në organizimin e infrastrukturës për porositjen, nisjen, transportimin dhe mbërritjen e lëndës narkotike”.
Prokuroria thotë se fakti që Çekaj iku drejt Gjermanisë dy ditë para kapjes së lëndës narkotike, si dhe konstatimi se biletën e avionit e kishte prerë vetëm vajtje, tregojnë dijeninë dhe përgjegjësinë e tij për drogën. Sipas organit të akuzës, mes Çekajt dhe të pandehurit tjetër, Donaldo Lushaj, janë kryer komunikime në Whatsapp mbi ngarkesën në fjalë.
Lushaj, i cili ka punuar me Çekajn prej disa vitesh, konsiderohet bashkëpunëtor për shkak se në kompaninë Arbri Garden njihej si drejtues dhe se ai ka udhëtuar disa herë jashtë vendit bashkë me punëdhënësin e tij. Shoferi Armando Pezaku argumentohet se ka njohje të mëparshme me Donaldo Lushajn pavarësisht se ky i fundit mohon.
