Ministrja përshëndet martesën e së dielës midis dy grave të reja – e para që kur legjislacioni historik u miratua një vit më parë – si një hap të madh përpara për shoqërinë malazeze.
Martesa e parë e të njëjtit seks në Malin e Zi u regjistrua të dielën në Budva, një vit pasi Mali i Zi u bë vendi i parë jo anëtarë i BE-së në Ballkan që legalizoi partneritetet civile të të njëjtit seks.
Një zyrtare komunale në Budva, Milijana Vukotic Jelusic, tha se martesa ishte midis dy grave të reja, të dyja nga jashtë, por me origjinë malazeze.
“Ne jemi të kënaqur që komuna jonë mundi të ishte e para që zbatoi Ligjin për Partneritetin e Jetës dhe u urojmë lumturi dhe shumë dashuri partnerëve në jetën e tyre së bashku”, tha Jelusic për gazetën e përditshme Vijesti.
Në korrik 2020, parlamenti në Malin e Zi votoi për legalizimin e partneriteteve civile të të njëjtit seks me një shumicë shumë të ngushtë të deputetëve nga Partia Demokratike e Socialistëve në pushtet, DPS, Social Demokratët, Partia Liberale dhe Partia Social Demokrate në opozitë.
Ndryshimi u mbështet nga vetëm 42 deputetë në parlamentin me 81 vende.
Sipas ligjit, qeveria kishte një afat deri më 15 korrik të këtij viti për të harmonizuar kornizën legjislative me ligjin e ri sipas të cilit çiftet e të njëjtit seks mund të martohen në zyrën e tyre lokale të gjendjes civile.
Ligji lejon gjithashtu rregullimin e mbështetjes së ndërsjellë financiare dhe ndarjen e pasurisë së përbashkët në rast divorci. Ai u jep atyre që janë në një partneritet civil të të njëjtit seks, të drejtën për sigurime shoqërore dhe mbulim shëndetësor bazuar në partnerin e tyre dhe rregullon vizitat familjare në spitale ose burgje.
Ai nuk siguron të drejtën për birësim ose marrje në kujdestari të fëmijëve.
Ministrja e Administratës Publike, Shoqërisë Digjitale dhe Medias, Tamara Srzentic, të dielën e quajti martesën e parë të të njëjtit seks në vend një hap historik.
“Edhe pse ligji u miratua një vit më parë, duhet bërë shumë më tepër për të përmbushur të gjitha parakushtet për zbatimin e tij të plotë. Komuniteti LGBTIQ do të më ketë gjithmonë një aleate për të gjitha aktivitetet që kontribuojnë në përmirësimin e cilësisë së jetës së tyre”, tha Srzentic.
Përkundër këtyre fjalëve mbështetëse, homoseksualiteti mbetet një çështje e ndjeshme në vendin ende konservator, siç është kudo tjetër në Ballkan.
Sondazhet e mëparshme sugjeruan se 71 për qind e qytetarëve në Malin e Zi e shikonin homoseksualitetin si një sëmundje dhe se një në dy qytetarë e shikonte atë si një rrezik për shoqërinë dhe dëshironte që shteti ta shtypte atë.
Mali i Zi dështoi dy herë më parë për të njohur bashkimet e të njëjtit seks – në 2014 dhe 2019. Kur ia doli mbanë në korrik 2020, ai u bë i vemti ish-republikë jugosllave jo anëtarë e BE-së që e bëri këtë gjë, megjithëse Serbia ka një legjislacion të ngjashëm në plan.
Nga republikat e tjera ish-jugosllave në rajon, Kroacia dhe Sllovenia kanë legalizuar lidhjet e të njëjtit seks.
