Këshilli i Lartë Gjyqësor hodhi poshtë kërkesën e gjyqtarit të Gjykatës së Apelit Durrës, Arben Vrioni për pension të parakohshëm.
Këshilli i Lartë Gjyqësor vendosi të mërkurën të hedhë poshtë kërkesën e gjyqtarit Arben Vrioni për të dalë në mënyrë të parakohshme në pension.
Vrioni është pezulluar nga detyra në nëntor 2019, pasi Komisioni i Pavarur i Kualifikimit vendosi ta shkarkojë për shkak të probleme për të justifikuar pasurinë e deklaruar. Ai e ka apeluar vendimin në Kolegjin e Posaçëm të Apelimit.
Gjatë mbledhjes të së mërkurës në KLGJ, relatorja Marçela Shehu vuri në pah se Vrioni e kishte filluar karrierën si ndihmës gjyqtar në vitin 1993 në Gjykatën e Gramshit, ndërkohë që në vitin 1994 ishte diplomuar në Fakultetin e Drejtësisë në Universitetin e Tiranës. Në vitin 1994 ai është transferuar si ndihmës gjyqtar në Gjykatën e Elbasanit.
Në Gjykatën e Elbasanit Vrioni ka bërë karrierë të shpejtë, duke u emëruar fillimisht gjyqtar në vitin 1995, nënkryetar një vit më vonë dhe në vitin 1999 si kryetar. Në vitin 2012, ai është emëruar nga Presidenti i Republikës si gjyqtar në Gjykatën e Apelit Durrës.
Sipas relatores Shehu, ligji “Për statusin e gjyqtarëvë dhe prokurorëve” kërkon që për të dalë në pension të parakohshëm, magjistrati të ketë mbushur moshën 60 vjeç dhe të këtë 30 vjet në funksion.
Ajo theksoi se në interpretim të ligjit, Vrioni nuk i plotëson kërkesat për miratimin e kërkesës, pasi ka vetëm 25 vjet që ushtron funksionin e gjyqtarit.
Shehu i kërkoi KLGJ-së që ta rrëzonte kërkesën. Ndryshe nga relatorja anëtarja e KLGJ-së Brunilda Kadi ishte e opinionit se KLGJ nuk mund të shprehet për kërkesën pa një vendim përfundimtar nga Kolegji i Posaçëm i Apelimit për ankimin e bërë nga gjyqtari Vrioni kundër vendimit të KPK.
Kadi kërkoi që KLGJ ta pezullojë vlerësimin e kërkesës deri sa vendimi i shkarkimit të marrë formë të prerë, duke iu referuar vendimeve të ngjashme të Këshillit për gjyqtarët që kërkojnë promovim në Gjykatën e Lartë
Megjithatë, me shumicë votash KLGJ e hodhi poshtë propozimin e gjyqtares Kadi dhe më pas votoit për rrëzimin në themel të kërkesës së gjyqtarit Vrioni për pension të parakohshëm.
