Ministria e Shëndetësisë i ka shtuar thirrjet për vaksinimin e popullatës kundër COVID-19, ndërsa kurba e rasteve aktive ka shënuar rritje.
Në dy javët ë fundit rastet aktive me COVID-19 janë trefishtuar. Sipas Ministrisë së Shëndetësisë 24 orët e fundit janë shënuar 284 raste të reja me COVID-19, duke e çuar numrin e rasteve aktive nga 421 në 1 gusht në 1524.
Trendi në rritje i kurbës së infektimeve me koronavirusin e ri, e ka shtyrë Ministrinë e Shëndetësisë t’i përforcojë thirrjet e saj drejtuar popullatës për t’u vaksinuar.
“Vaksinimi ndaj COVID19 shmang format e rënda të sëmundjes, ul hospitalizimet dhe mbron shëndetin tuaj,” theksoi Mininistrja Ogerta Manastirliu në një mesazh në mediat sociale të martën.
Ministrja shtoi se vaksinimi gjatë muajit gusht është i hapur për të gjithë qytetarët mbi moshën 18 vjeç dhe dozat mund të administrohen pranë qendrave shëndetësore.
Sipas të dhënave të Ministrisë së Shëndetësisë, që nga fillimi i fushatës së vaksinimit kundër COVID-19 në janar janë administruar 1.28 miliona doza vaksine.
Nga fillimi pandemisë deri të enjten me 12 gusht, në Shqipëri janë infektuar 134,487 persona me COVID-19 dhe 2460 pacientë kanë humbur jetën. Në Spitalin Infektiv aktualisht po marrin trajtim spitalor të specializuar 34 pacientë, ndërkohë në 24 orët e fundit nuk ka pasur asnjë humbje jete me Sars-Cov2 pozitiv.
