Të dhënat e Institutit të Statistikave për tremujorin e dytë 2021 tregojnë një rikthim të numrit të vdekjeve mes shqiptarëve në kuota pak a shumë normale pas rritjes dramatike në dy tremujorët e mëparshëm.
Vdekshmëria në Shqipëri shënoi një nivel relativisht të ulët gjatë tremujorit të dytë të këtij viti (prill, maj dhe qershor), pas rritjes dramatike të shënuar gjatë dimrit të kaluar, një shenjë tjetër e qartë që sugjeron shkallë vdekshmërie të lartë të shkaktuar nga COVID-19. Të dhënat e Institutit të Statistikave të publikuara të enjten, tregojnë se në Shqipëri u shënuan 5,777 vdekje në këtë tremujor, shifër kjo rreth 15% më e lartë se sa mesatarja shumëvjeçare, por sërish shumë më e ulët se sa 9,657 vdekjet e shënuara në tremujorin e parë apo 9,397 të tjera të shënuara në tremujorin e fundit 2020.
Rënia e shpejtë e vdekjeve të tepërta përkon me periudhën gjatë së cilës numri i infektimeve me COVID-19 në Shqipëri ra ndjeshëm. Sipas të dhënave zyrtare, numri mesatar i infektimeve ditore me coronavirus në Shqipëri ra nga rreth 300 vetë në fillim të prillit në më pak se 3 në ditë në fund të qershorit.
Në tre vitet para pandemisë, në tremujorin e dytë në Shqipëri kanë vdekur mesatarisht rreth 5 mijë vetë. Kjo tregon se në tremujorin e dytë 2021 ende kemi rreth 700 vdekje më shumë se sa mesatarja historike, shifër kjo që nuk shpjegohet dot me statistikat zyrtare të vdekjeve nga COVID-19. Sipas të dhënave të qeverisë, gjatë këtyre tre muajve, 215 shqiptarë humbën jetën për shkak të komplikimeve të shkaktuara nga COVID-19.
Shqipëria është përfshirë herë pas here nga debati nëse statistikat zyrtare të numrit të vdekjeve nga COVID-19 reflektojnë apo jo realitetin. Zyrtarisht që nga fillimi i pandemisë në Shqipëri ka pasur 2460 viktima ndërkohë që gjatë periudhës së pandemisë statistikat mbi numrin e vdekjeve tregojnë rreth 10 mijë vdekje më shumë se sa në një vit pa pandemi.
Deri më sot autoritetet shëndetësore nuk kanë treguar ndonjë interes për të hetuar mbi shkaqet e rritjes së vdekshmërisë mes shqiptarëve.
Instituti i Statistikave publikoi të enjten të dhënat demografike të tremujorit të tretë. Përveç rritjes së vdekshmërisë, periudha e pandemisë duket se ka përkuar edhe me një përshpejtim të rënies së numrit të lindjeve. Në tremujorin e dytë të këtij viti u shënuan rreth 6 mijë lindje, rreth 900 më pak se sa mesatarja e këtij tremujori për të katër vitet e fundit. Lindjet në Shqipëri kanë tendencë rënieje që prej dekadash por shkalla e rënies në tremujorin e dytë të këtij viti është më e lartë se sa në tremujorët e mëparshëm.
Sa i përket shtesës natyrore, në tremujorin e dytë pati 216 lindje më shumë se sa vdekje. Shtatë nga dymbëdhjetë qarqe të vendit patën rënie natyrore ndërsa pesë, Tirana, Dibra, Durrësi, Kukësi dhe Lezha, patën rritje të lehtë.