Agjencia Shtetërore për Shpronësim nis me urgjencë procedurën e shpronësimit të “Banesës së Toptanasve” dhe “Sarajeve të Libohovitëve” për t’i hapur rrugë zbatimit të projektit të deklaruar nga kryebashkiaku Erion Veliaj për t’i kthyer në muze.
Tre ditë pas tentativës së djegies së monumentit të kulturës në qendër të Tiranës, i njohur si “Sarajet e Toptanasve” si dhe pas deklaratës së kryetarit të Bashkisë së Tiranës, Erion Veliaj se ky objekt do të shpronësohej për t’u kthyer në muze, ka nisur zyrtarisht edhe procedura e shpronësimit.
Agjencia Shtetërore për Shpronësim shpalli të premten në Fletoren Zyrtare kërkesën për shpronësim për interes publik të pasurive private që preken nga restaurimi i “Banesa e Toptanasve”, Muzeu Etnografik i Tiranës si dhe “Sarajet e Libohovitëve”, me vlerë paraprake shpronësimi respektivisht në 178.6 milionë lekë dhe 505.8 milionë lekë.
Në kërkesën që mban datën 19 gusht, thuhet se subjekti kërkues i këtij projekti është Bashkia e Tiranë.
Agjencia Shtetërore për Shpronësim sqaron se me anë të këtyre publikimeve kërkon të vërë në dijeni pronarët e këtyre pasurive, të cilat do të preken nga shpronësimi.
Mbrëmjen e 16 gushtit, godina e quajtur “Sarajet” në rrugën “Abdi Toptani” në Tiranë, një ndër të paktët monumente të kulturës të mbijetuara në kryeqytet, u përfshinë nga flakët duke shkaktuar dëme materiale.
Videot e flakëve brenda godinës bënë xhiro në rrjetet sociale mesnatën e së hënës dhe shkaktuan zemërim. Flakët u shuan më pas nga zjarrfikëset, duke bërë të mundur ndalimin e djegies së godinës, një pjesë e së cilës është e ndërtuar me materiale druri.
“Sarajet” u ndërtuan rreth viteve 1830-1840 nga familja Toptani dhe është një ndër godinat më të vjetra në Tiranë, e shpallur monument kulture në vitin 1973. Në vitet ‘20 të shekullit të kaluar, aty ishte vendosur Legata e Shteteve të Bashkuara. Pas viteve ’90, prona ka kaluar nëpër një kalvar gjyqësor përpara se t’u kthehej pronarëve.
Publikimi i videove që tregonin avancimin e flakëve brenda godinës ngjallën spekulime në rrjetet sociale se monumenti i kulturës po digjej gjithashtu për t’u zëvendësuar nga një kullë shumëkatëshe.
Por kryetari i Bashkisë së Tiranës, Erion Veliaj akuzoi pronarët e ligjshëm se përmes zjarrvënies së qëllimshme po tentonin të ndalonin planet e bashkisë për shpronësimin e “Sarajeve” dhe kthimin e tyre në muze.
Zjarrvënia te “Sarajet” po hetohet nga Prokuroria e Tiranës, me dyshimin se akti ka qenë i qëllimshëm.