Këshilli i Ministrave miratoi një vendim për mbrojtje të përkohshme të refugjatëve të pritshëm nga Afganistani si dhe ngritjen e një task-force për menaxhimin e tyre.
Këshilli i Ministrave miratoi të mërkurën vendimin për dhënien e mbrojtjes së përkohshme të shtetasve afganë që kanë gëzuar qëndrim të përkohshëm ose të përhershëm në Republikën Islamike të Afganisanit, si dhe për krijimin e task-forcës për menaxhimin e situatës.
Në vendimin e qeverisë thuhet se mbrojtja e përkohshme do t'u jepet të gjithë shtetasve afganë apo personave që kanë jetuar në Afganistan, të cilët hyjnë masivisht dhe të koordinuar nga partnerët ndërkombëtarë në territorin e Republikës së Shqipërisë.
“Për arsye të luftës, situatës së ngjashme, dhunës së përgjithshme dhe konfliktit të brendshëm, të karakterizuara nga shkelje të të drejtave të njeriut dhe që kërkojnë mbrojtje nga Republika e Shqipërisë”, argumenton qeveria mbi arsyen e kësaj vendimarrje dhe vijon sqarimin se këta shtetas do të gëzojnë mbrojtje të përkohshme për një afat 1-vjeçar nga momenti që mbërrijnë.
Kryeministri Edi Rama ka deklaruar se Shqipëria është e gatshme të presë deri në 3 mijë refugjatë afganë, të cilët po përpiqen të shpëtojnë nga talebanët. Megjithatë, për shkak të situatës së tensionuar në aeroportin e Kabulit, evakuimet janë shtyrë dhe është e paqartë se kur ata do të mbërrijnë në Shqipëri.
Në vendimin e Këshillit të Ministrave parashikohet se nuk mund të përfitojnë ata persona të cilët kanë kryer krime kundër paqes, krime lufte ose kundër njerëzimit; krim të rëndë jopolitik jashtë Republikës së Shqipërisë; kur janë shpallur fajtorë në kundërshtim me qëllimet dhe parimet e Kombeve të Bashkuara dhe kur paraqesin rrezik për sigurinë kombëtare dhe rendin publik në Shqipëri.
Këshilli i Ministrave ka vendosur të krijojë edhe një task-forcë për menaxhimin e fluksit të kërkesave për mbrojtje ndërkombëtare nga shtetasit afganë. Task-forca do të kryesohet nga Ministrja për Evropën dhe Punët e Jashtme dhe do të ketë në përbërje edhe gjashtë ministra të tjerë; Ministrin e Brendshëm; atë të Mbrojtjes; Ministrin e Financave dhe Ekonomisë; Ministrin e Arsimit, Sportit dhe Rinisë; Ministrin e Shëndetësisë dhe Mbrojtjes Sociale; si dhe atë të Turizmit dhe Mjedisit.
Në vendim thuhet se task-forca ka si detyrë të negociojë me partnerët ndërkombëtarë, të hartojë planin e veprimit për menaxhimin e fluksit të kërkuesve për mbrotje ndërkombëtare; për pritjen dhe akomodimin e shtetsave afganë; të evidentojë nevojat emergjente për t'i paraprirë punës me ndryshimet e mundshme të kuadrit ligjor, nënligjor e rregullator; të analizojë kërkesat shtesë buxhetore për funksionimin, shpenzimet dhe bazën e nevojshme material; si dhe të koordinojë fondet e donatorëve.
Sipas VKM-së, task-forca do të veprojë deri në përfundimin e shqyrtimit të kërkesave për mbrojtje ndërkombëtare nga shtetasit afganë dhe personat e tjerë që mbërrijnë nga Republika Islamike të Afganistanit.