Komiteti Teknik i Ekspertëve deklaroi se masat aktuale janë të mjaftueshme, por problem mbetet zbatimi i tyre. Zonat më të prekura nga variant Delta në Shqipëri janë qytetet turistike të Sarandës dhe Himarës.
Komiteti Teknik i Ekspertëve nuk vendosi masa të reja shtrënguese të mërkurën, pavarësisht rritjes së rasteve të reja, shtrimeve në spital si dhe qarkullimit intensiv të variantit Delta të koronavirusit të ri në Shqipëri.
Zv.ministrja e Shëndetësisë, Mira Rakacolli tha se situata është e kontrolluar dhe niveli aktual i masave është i mjaftueshëm për t’iu përgjigjur situatës.
“Problem mbetet zbatimi i tyre,” tha Rakacolli, ndërsa bëri thirrje për detyrimin e mbajtjes së maskës në ambiente të brendshme si dhe në vende me grumbullime të mëdha njerëzish si qendrat tregtare, supermarketet dhe në aeroport.
Mbajtja e maskës në ambiente të mbyllura është një prej masave të detyrueshme për parandalimin e përhapjes së COVID-19, por që nuk zbatohet masivisht. Masa të tjera në fuqi janë ndalimi i grumbullimeve mbi 50 persona, ndalimi i qarkullimit nga ora 24:00 e mbrëmjes deri në 6:00 të mëngjesit si dhe ndalimi i muzikës pas orës 23:00.
Ndërsa incendenca e qarkullimit të virusit është rritur me pesë herë gjatë gushtit, qytetet më të prekura për numër popullsie janë zonat turistike si Saranda dhe Himara, të ndjekura nga Malësia e Madhe, Shkodra, Tirana dhe Vlora.
Anëtarët e Komitetit Teknik të Ekspertëve e konsideruan të suksesshme fushatën e vaksinimit në Shqipëri, ku vetëm 590 mijë qytetarë ose 27% e popullsisë i ka marrë tashmë të dyja dozat. Numri i personave të vaksinuar vetëm me një dozë është rreth 780 mijë persona ose 37%.
Vaksinimi konsiderohet si elementi më i rëndësishëm në parandalimin e përhapjes së infeksionit dhe për më tepër, për shmangien e rasteve të rënda dhe hospitalizimeve.
Sipas Silva Binos, rreth 95% e të infektuarve në Shqipëri janë të pavaksinuar. Ajo shtoi gjithashtu se mes personave të vaksinuar plotësisht, shansi për t’u infektuar është 32 herë më pak, ndërsa mes atyre që kanë marrë vetëm një dozë është 12 herë më pak.
