Gjyqtarja e Beratit, Adelajda Gjuzi do të përballet të enjten me Komisionin e Pavarur të Kualifikimit. Skeda grafike tregon ndryshimin e pasurisë së saj familjare.Adelajda Gjuzi, gjyqtare e Gjykatës së Beratit do të përballet të enjten më 2 shtator me Komisionin e Pavarur të Kualifikimit. Procesi i saj i vetingut po kryhet nga trupa gjyqësore e përbërë nga Alma Faskaj, Genta Tafa Bungo dhe Lulzim Hamitaj.
Adelajda Gjuzi përfundoi Shkollën e Magjistraturës në vitin 2013 dhe pas një periudhe stazhi në Gjykatën e Tiranës, u emërua gjyqtare në Gjykatën e Beratit. Gjatë periudhës 2014-2015, Gjuzi ka punuar si ndihmëse ligjore në Gjykatën e Lartë dhe është kthyer më pas në Berat në funksionin e gjyqtares.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë së deklaruar nga gjyqtarja Adelajda Gjuzi nga viti 2012 deri në fund të vitit 2016. [Kliko për skedën në PDF].
Në deklarimin për herë të parë në vitin 2012, gjyqtarja Adelajda Gjuzi deklaronte pasuri familjare me vlerë 5 milionë lekë, ndërsa në fund të vitit 2016, pasuria familjare kap vlerën e 10.9 milionë lekëve.
Ajo zotëron familjarisht një apartament me vlerë 8.6 milionë lekë, likujditete bankare prej 1.3 milionë lekësh, automjet me vlerë 1 milion lekë si dhe kursime në cash prej 10 mijë lekësh.
Të ardhurat familjare për periudhën deklaruese janë 9.7 milionë lekë, nga të cilat 40% burojnë nga paga e subjektit, rreth 24% nga paga e bashkëshortit dhe 32% nga dhuratat në cash të familjarëve.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 5 vite, asnjë prej deklaratave nuk rezultoi me probleme.
Nga analiza cilësore e deklaratave të pasurisë, BIRN identifikoi si “flamuj të kuq” një dhuratë në cash nga prindërit si dhe një hua, të cilat shërbyen si burime për blerjen e një apartamenti.
Në vitin 2014, subjekti Adelajda Gjuzi deklaron blerjen e një apartamenti në Farkë të Tiranës me vlerë 8.6 milionë lekë, me burim financimi 3 milionë lekë të dhuruara nga prindërit e bashkëshortit, 3.5 milionë lekë nga pakësimi i një depozite bankare si dhe 1.6 milionë lekë detyrim i pashlyer ndaj firmës së ndërtimit. Ky detyrim do të shlyhet në vitin 2015 përmes një huaje të marrë në të njëjtën vlerë.
Ndërsa në vitin 2016, bashkëshorti i subjektit deklaron se ka në përdorim një garazh me vlerë 12 mijë euro në pronësi të babait të tij.
Deklarata Para Fillimit të Detyrës
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Për më shumë dokumente vizitoni databazën tonë dokumente.reporter.al
