Një zjarr i vënë për pastrimin e shkurreve, shkaktoi djegien e një sipërfaqe toke të mbjellë me ullinj në një fshat të Poliçanit në fund të Gushtit, ndërkohë që policia vendore deklaroi se ka arrestuar autorin e dyshuar.
Një zonë e njohur për kultivimin e ullinjve në fshatin Vërtop të Bashkisë së Poliçanit, u përfshi nga flakët në fund të muajit gusht. 10 hektarë me pemë dhe ullij u dogj krejtësisht, po ashtu u dogj edhe një sipërfaqe e konsiderueshme me shkurre.
Ndërkohë të martën Specialistët për Hetimin e Krimeve në Stacionin e Policisë Poliçan, bën me dije arrestimin e autorit të dyshuar të këtij zjarri. “Në vijim të punës për zbulimin dhe vënien përpara përgjegjësisë ligjore të autorëve të zjarrvënieve, u arrestua shtetasi A.F., 46 vjeç, banues në fshatin Vërtop, pasi dyshohet se ka ndezur zjarr dhe si pasojë është djegur 10 ha tokë e mbjellë me ullinj dhe një sipërfaqe me shkurre”, tha policia në një njoftim për shtyp mesditën e kësaj të marte.
Nisur nga temperaturat e larta Drejtoria Vendore e Policisë Berat apelon të gjithë banorët, që në asnjë rast të mos shkaktojnë zjarrvënie.
