Shumica në Konferencën e Kryetarëve vendosi që mbledhjet e komisioneve parlamentare të zhvillohen online; një vendim që u kundërshtua nga deputetët e opozitës si antikushtetues dhe si një tentativë për të vrarë parlamentarizmin.
Kuvendi i Shqipërisë e nisi legjislaturën me një vendim të Konferencës së Kryetarëve për t’i zhvilluar virtualisht mbledhjet e komisioneve parlamentare; një vendim që u kundërshtua ashpër nga Partia Demokratike në opozitë si antikushtetues dhe një tentativë për të vrarë parlamentarizmin.
Socialistët që përbëjnë shumicën vendimarrëse në Konferencën e Kryetarëve argumentuan të enjten se ky vendim bazohej në masat e ndërmarra për parandalimin e pandemisë së COVID-19.
Kryetarja e Kuvendit, Lindita Nikolla, paraqiti në mbledhje një letërkëmbim me drejtuesen e Komitetit Teknik të Ekspertëve, Mira Rakacolli, ku sugjerohej që seancat plenare të Kuvendit të zhvilloheshin fizikisht, ndërsa komisionet parlamentare të mbaheshin online, pasi përbënin rrezik për shëndetin e deputetëve.
Megjithatë, BIRN mësoi se vendimi ishte paracaktuar dhe se administrata e Kuvendit po përgatitej prej ditësh që të siguronte anën teknike për punën online të komisioneve si dhe u kishte shpërndarë tableta deputetëve. Një deputet i PD-së tha se javën e shkuar u ishte thënë gojarisht nga ana e administratës që komisionet pritej të zhvilloheshin online.
Vendimi për zhvillimin online të komisioneve parlamentare vjen në një kohë me masa të lehtësuara kundër përhapjes së COVID-19 dhe kur pjesa më e madhe e tyre nuk zbatohen.
Debati me dyer të mbyllura në Konferencën e Kryetarëve u zhvendos në sallën e parlamentit, ku kryetari i grupit parlamentar të PD-së, Alfred Rushaj e cilësoi vendimin në cenim të Kushtetutës dhe demokracisë dhe kërkoi shfuqizimin e tij.
“Rregullorja përcakton rastet kur komisionet mund të mblidhen në distancë, çka e përjashton situatën aktuale,” tha Rushaj, ndërsa shtoi se “kufizimet vendosen për shkak të gjendjes së luftës apo gjendjes së jashtëzakonshme”.
Deputetët opozitarë sollën gjithashtu në kujtesë se si parlamenti virtual ishte kthyer në qesharak gjatë legjislaturës së kaluar, kur deputetët futeshin në mbledhjet online nga makinat apo lokalet, në vend që të ishin në krye të detyrës.
Deputeti demokrat, Tritan Shehu hodhi idenë e bojkotit të komisioneve, por sekretari i Përgjithshëm, Gazmend Bardhi tha se tre grupet parlamentare të opozitës do të marrin një vendim deri të premten për qëndrimin e tyre.
“Vendimi është i papranueshëm, është mungesë e plotë transparence dhe ka si qëllim t’i fshihet syve të opinionit publik,” tha Bardhi.
Kryetari i grupit parlamentar të Partisë Socialiste, Taulant Balla, e mbrojti vendimin për zhvillimin online të komisioneve, duke e konsideruar atë si një shembull që duhet të ofrojë Kuvendi për zbatimin e vendimeve të Komitetit Teknik të Ekspertëve.
Balla foli gjithashtu për vaksinim të detyruar për 140 deputetët e Kuvendit të Shqipërisë.
“Pika më e rëndësishme është që kemi rënë dakord që Kuvendi të vendosë një afat, brenda së cilit në Kuvendin e Shqipërisë të mos hyjë asnjë deputet i pavaksinuar,” tha ai.
Në një njoftim për mediat, Partia Demokratike tha se propozimi për vaksinimin e të gjithë deputetëve kishte ardhur pikërisht nga përfaqësuesit e saj, si një rrugëzgjidhje për të shmangur vendimin për mbledhjet online.
