Komisioni i Pavarur i Kualifikimit vendosi unanimisht të shkarkojë nga detyra gjyqtaren e Gjykats Administrative të Tiranës, Semiramis Hoxholli.
Komisioni i Pavarur i Kualifikimit, KPK shpalli të premten vendimin për shkarkimin nga detyra të gjyqtares së Gjykatës Administrative të Tiranës Semiramis Hoxholli.
Teupi gjykues që kreu procesin e rivlerësimit për Hoxhollin kryesohej nga Etleda Çiftja, me relatore Alma Faskajn dhe anëtare Surla Zhegun.
Gjatë seancës dëgjimore të mërkurën në KPK, Hoxholli u përball me pyetje rreth mosdeklarimit të dënimit të vëllait të saj në Greqi për trafik droge, si dhe iu kërkuan shpjegime për një transfertë që kishte kryer për llogari të një pedagogu të saj drejt Kinës.
Në shpjegimet e dhëna në sallë Hoxholli tha se hetimi ishte korrekt, por i kërkoi Komisionit të besonte se ajo dhe prindërit e saj nuk kishin qenë në dijeni të dënimit.
Lidhur me transfertën ajo u shpreh se nëse do ti kërkohej në këto rrethana dhe pas asaj që kishte mësuar, nuk do ta bënte më këtë favor.
Semiramis Hoxholli përfundoi studimet në Shkollën e Magjistraturës në vitin 2016. Pas një periudhe si gjyqtare stazhiere në Gjykatën e Tiranës, ajo u emërua gjyqtare në Gjykatën Administrative të Tiranës, ku e ushtroi funksionin deri në momentin e shkarkimit.
