Struktura e Posaçme Anti Korrupsion mbylli për disa orë zyrat e kadastrës në Vlorë, ndërsa thuhet se bllokoi disa praktika, Operacioni ndodhi në të njëjtën ditë kur ASHK Vlorë prezantoi drejtorin e 10, në 2 vitet e fundit.
Prokuroria e Posaçme bllokoi paraditen e të premtes Agjencinë Kombëtare të Kadastrën në Vlorë. Burimet të ASHK, që kërkuan të ishin anonimë, thanë se prokurorët kishin sekuestruar disa dosje, kryesisht praktika që kanë të bëjnë me pronësinë në bregdetin e Himarës.
Po ashtu sipas burimeve u sekuestruan praktika të pronësisë të ish-Prokurorit të Sarandës, Sali Hasa. Drejtuesi i SPAK Arben Kraja i tha BIRN se aksioni ishte një veprim rutinë. “Është veprim rutinë marrje aktesh”, tha Kraja.
Bllokimi i zyrave paraditen e të premtes u shoqërua me protestë të improvizuar të qytetarëve që ndodheshin në pritje para dyerve të institucionit për problemet e tyre. Disa prej tyre që presin prej vitesh përgjigje nga Kadastra për pronat u revoltuan, madje dikush tentoi të hynte edhe nga kangjellat e institucionit.
Mbërritja e SPAK dhe oficerëve të BKH-së nuk është e papritur në ASHK-në e Vlorës. Institucioni shpesh herë ka qenë në qendër të akuzave, ndërsa konfliktet për pronat kanë detyruar ndryshimin e 10 drejtuesve që prej shtatorit 2019.
Në fakt njëkohësisht me SPAK të premten u prezantua edhe drejtori i ri i ASHK-së Vlorë, Reinard Meta. Meta i zuri vendin Klodian Trocit, i cili dha dorëheqjen zyrtarisht për arsye familjare. Troci ishte për herë të dytë drejtues i ASHK-së Vlorë që prej fillimit të lëvizjeve në shtator të dy viteve më parë. Më herët në këtë zyra kanë drejtuar në periudha të shkurtra edhe Florian Alimadhi, juristi Alteo Nazëraj, Elona Hodaj (Kurti), Taulant Canameti, Bilbil Aliaj, Viola Hima dhe Jurgen Pilkapi.
