Kryetari i Partisë Demokratike Lulzim Basha njoftoi të hënën se aksioni politik i partisë së tij përfshin ngritjen e tre komisioneve hetimore parlamentare, të cilat do të kenë për detyrë, mes të tjerash, të hetojnë aferën e incineratorëve, masakrën zgjedhore dhe çështjen Becchetti.
Grupi parlamentar i Partisë Demokratike do të dorëzojë së shpejti në Kuvendin e Shqipërisë tre kërkesa për ngritjen e komisioneve hetimore për tre çështje të ndryshme, bëri të ditur kryetari i demokratëve Lulzim Basha të hënën në një prononcim për median.
Basha deklaroi se këto nisma janë pjesë e asaj që ai e quajti “ofensiva parlamentare” e cila do të jetë pjesë e aksionit opozitar kundër qeverisë së kryeministrit Edi Rama.
“Kush i ka harruar pamjet e qyteteve tona që digjeshin gjatë verës vetëm e vetëm për për të justifikuar që ato pak para që i kanë mbetur nga taksat e shqiptarëve t’i çonin te mafia e incineratorëve?” pyeti Basha në mënyrë retorike duke iu referuar krizës së mbeturinave të pahequra në Durrës, e cila përfundoi me një kontratë të re dhjetëramilionëshe për kompaninë koncesionare të menaxhimit të landfillit të Tiranës, si dhe djegies në qiell të hapur të plehrave në qytetin e Fierit.
“Mafia e incineratorëve, bashkëpunimi i tyre me zyrtarët më të lartë të shtetit, përbën një korrupsion në kurriz të qytetarëve shqiptarë, përbën gjithashtu një masakër shëndetësore mbi shqiptarët,” deklaroi Basha.
Aktualisht qeveria ka dhënë tre koncesione me vlerë qindramilionë euro për ndërtimin e incineratorëve dhe për menaxhimin e fushave të depozitimit të mbetjeve në Elbasan, Tiranë dhe Fier. Të treja kompanitë duket se janë të lidhura me njëra-tjetrën. BIRN zbuloi shtatorin e kaluar se Mirel Mërtiri, i afërt me ish-ministrin e Financave, Arben Ahmetaj dhe me lidhje në të dyja krahët e politikës, qëndron në hijen e koncesioneve të mbetjeve në Shqipëri përmes një rrjeti kompanish satelite. Mërtiri ka hedhur BIRN në gjyq për “dëm moral dhe ekzistencial”.
Nga ana tjetër, ish-Ministri i Mjedisit Lefter Koka, u akuzua nga ish-partia e tij, Lëvizja Socialiste për Integrim, se ka përfituar 3.3 milionë euro përmes një rrjeti kompanish fantazmë të paguara nga Incineratori i Elbasanit. Koka iu përgjigj akuzës duke akuzuar LSI-në si “mosmirënjohëse” ndërsa i konsideroi akuzat si “shpifje”.
Çështjet janë aktualisht prej muajsh nën hetim nga Struktura e Posaçme Kundër Korrupsionit dhe Krimit të Organizuar, SPAK, e cila deri më tani nuk ka dërguar çështjen për gjykim dhe as nuk ka njoftuar ngritjen e ndonjë akuze ndaj ndonjë të dyshuari.
Basha deklaroi gjithashtu se PD do të synojë ngritjen e një komisioni hetimor për atë që e quajti “masakër zgjedhore” për zgjedhjet parlamentare të 25 prillit, të cilat, partia e tij i humbi. Sipas Bashës, ky komision do të hetojë “që ga sistemi krimininal i patronazhistëve që vodhi dhe keqpërdori të dhënat e qytetarëve për t’i shantazhuar ata te keqpërdorimi i burimeve shtetërore, te keqpërdorimi dhe abuzimi me fondet e tërmetit, me legalizimet, me punësimet, e kështu me radhë.”
Komisioni i tretë parlamentar do të synojë të zbulojë përgjegjësi për çështjen Beçhetti. Biznesmeni kontrovers italian humbi pronat në Tiranë dhe fitoi mbi 100 milionë euro dëmshpërblim në drejtësinë ndërkombëtare. Beçhetti pretendoi se është persekutuar politikisht nga Edi Rama për shkak të qëndrimit opozitar të televizionit të tij Agon Channel, i cili u sekuestrua nga autoritetet shqiptare nën aludimet për pastrim parash.
Sipas Bashës, humbja e një shume kaq të madhe parash nga Shqipëria erdhi “për shkak të luftës personale dhe politike të Edi Ramës shqiptarëve”.
Sipas Bashës, komisionet parlamentare nevojiten për shkak se sistemi i drejtësisë nuk duket se po vepron.
“Nëse drejtësia do të ishte në lartësinë e duhur, shumica e këtyre çështjeve do të kishin të pandehur,” deklaroi ai.
Komisionet hetimore parlamentare krijohen me nismën e një të katërtës së deputetëve ndërsa shumica parlamentare nuk ka fuqi ligjore ta bllokojë një nismë të tillë.
