Formati i zhvillimit të mbledhjeve në komisionet parlamentare u kthye në mollë sherri mes mazhorancës dhe deputetëve të opozitës, ndërsa këta të fundit akuzuan kryeministrin Edi Rama se ‘ka vendosur videokraci’.
Mbledhjet e para të komisioneve parlamentare në Kuvendin e Shqipërisë nisën me tension dhe një situatë të pazakontë të martën, ku gjysma e anëtarëve ishin të loguar online dhe pjesa tjetër ishin fizikisht të pranishëm nëpër salla.
Kjo pasi Partia Demokratike vendosi të mos e zbatojë vendimin e shumicës në Konferencën e Kryetarëve për zhvillimin online të mbledhjeve, për shkak të pandemisë së COVID-19.
Në komisionin parlamentar për Çështjet Ligjore, Administratën Publike dhe të Drejtat e Njeriut, kryetarja Klotilda Bushka u uroi mirëseardhjen kolegëve opozitarë, por nuk u dha atyre fjalën, duke u kërkuar që të logoheshin në platformën online.
Deputeti demokrat, Gazmend Bardhi dëgjohej në audio teksa kërkonte fjalën me argumentin se këtë ia garanton Kushtetuta, ndërsa shumica e deputetëve të pranishëm në platformën online po votonin për rendin e ditës.
Nënkryetari i komisionit të Ligjeve, Oerd Bylykbashi tha për mediat pas mbledhjes se kjo ishte prova e parë që “Edi Rama ka vendosur videokraci”.
“Ai do të qeverisë nëpërmjet mjetesh të cilat mohojnë demokracinë,” tha Bylykbashi, duke shtuar se opozita do të vijojë refuzimin e mbledhjeve online.
“Mazhoranca, Edi Rama po i mohon opozitës që të marrë pjesë dhe të kundërshtojë në Parlament të gjitha aferat që ai përpiqet t’i kthejë në ligj,”shtoi ai.
E njëjta situatë u përsërit edhe në komisionin për Sigurinë Kombëtare, ku kryetari Nasip Naço i dëgjoi kolegët e tij opozitarë, por u bëri të qartë se nuk mund t’u jepte fjalën nëse ata nuk logoheshin në platformën online të mbledhjes.
Ndërsa në Komisionin për Punën, Çështjet Sociale dhe Shëndetësinë, kryetarja demokrate, Albana Vokshi e zhvilloi mbledhjen në sallë, në mungesë të anëtarëve të mazhorancës. Vokshi tha se kishte njoftuar kolegët e mazhorancës dhe kryetaren e Kuvendit se mbledhja do mbahej fizikisht, bazuar në vendimin e Konferencës së Kryetarëve që lejonte kryesitë e komisioneve të vendosnin për mënyrën si do zhvillohej mbledhja.
Partia Demokratike në një reagim zyrtar akuzoi se ndërsa Vokshi po denonconte me foto standardet e dyfishta të mazhorancës për zbatimin e masave anti-Covid, u ndërpre transmetimi live në RTSH.
Vetë Vokshi e konsideroi episodin një ‘akt të paprecedentë dhe goditje të parlamentarizmit’ nga stafi i Kuvendit.
Ndryshe nga vendimi i shumicës në Konferencën e Kryetarëve, Partia Demokratike këmbëngul se deputetët e saj do të kenë pjesmarrje fizike në të gjitha komisionet parlamentare. Zyra e shtypit e PD-së shpërndau dhe pamje filmike nga sallat e mbledhjeve, ndërsa Kuvendi transmetoi mbledhjet online në faqen e Facebook-ut.