Ish-gjyqtari i Gjykatës Evropiane për të Drejtat e Njeriut, Kristaq Traja i njohur për kontributet e vazhdueshme në fushën e ligjit benda dhe jashtë kufijve të Shqipërisë, ka ndërruar jetë nga një sëmundje e rëndë.
Ndahet nga jeta juristi i njohur Kristaq Traja, i cili ka mbajtur pozicionin e gjyqtarit pranë Gjykatës Evropiane për të Drejtat e Njeriut, GJEDNJ gjatë periudhës 1998-2008, si përfaqësues i Shqipërisë.
Lajmi për ndarjen nga jeta i Trajës është bërë i ditur edhe nëpërmjet një mesazhi ngushëllimi të publikuar të mërkurën në faqen online të institcionit të Inspektorit të Lartë të Drejtësisë, Artur Metani.
Në mesazhin e Metanit thuhet se Traja ka ndërruar jetë për shkak të një sëmundje të rëndë. “Largimi i një personaliteti të jurisprudencës, i një mendje të ndritur, me kontribut kombëtar e ndërkombëtar është një humbje e madhe për të gjithë komunitetin e profesionistëve të së drejtës”, shprehet Metani.
Veç pozicionit të gjyqtarit të GJEDNJ, i ndjeri Traja ka qenë dhe një prej ekspertëve të nivelit të lartë për reformën në drejtësi në Shqipëri.
Traja është diplomuar në drejtësi në Universitetin e Tiranës në vitin 1978 dhe e ka filluar karrierën si ekspert në fushën e ligjit në vitin 1986 në Prokurorinë e Përgjithshme në sektorin e studimeve, detyrë që e ka ushtruar deri në vitin 1991. Gjatë periudhës 1991-1992 ka qenë anëtar i Bordit të Kodifikimit në Ministrinë e Drejtësisë, ndërsa në vitet 1992-1993, ka mbajtur postin e Zv/ministrit të Drejtësisë.
Nga viti 1994 ai ka qenë pedagog i të Drejtës Kushtetuese në Fakultetin e Drejtësisë në Universitetin e Tiranës, si dhe në Shkollën e Magjistraturës. Gjithashtu, Traja ka qenë edhe një prej anëtarëve të grupit të punës për hartimin e Kushtetutës së Republikës së Shqipërisë të vitit 1998, si dhe kryetar i Këshillit Drejtues të RTVSH-së. Traja ka ushtruar edhe profesionin e avokatit dhe ka kontribuar në fushën e jurispudencës me disa publikime dhe përkthime.
