Qeveria ka ngritur një grup pune, i cili do të përgatisë masat për menaxhimin e krizës energjitike të shpallur nga kryeministri Edi Rama më herët. Ahmetaj dhe Ibrahimaj folën për një paketë financiare mbështetëse për konsumatorin.
Qeveria vendosi të mërkurën që të ngrejë një grup pune, i cili do të miratojë një plan për menaxhimin e situatës energjitike në vend, në pritje të krizës së paralajmëruar tri ditë më parë nga kryeminstri.
Zv/kryeministri Arben Ahmetaj tha pas mbledhjes së qeverisë se përpjekjet po bëhen për të mbrojtur konsumatorin shqiptar nga vala e çmimeve ndërkombëtare, që sipas tij “prek edhe brigjet e Shqipërisë”.
“Ministria e Infrastrukturës dhe Energjisë dhe kompanitë që janë në këtë fushë janë duke punuar brenda grupit ndërinstitucional për të garantuar furnizim të pandërprerë dhe akses në tregun ndërkombëtar për të blerë energji në mënyrë të vazhdueshme, që të mos ketë ndërprerje të energjisë,“ tha Ahmetaj.
Njësoj si kryeministri, edhe Ahmetaj e lidhi krizën e pritshme me atë që po ndodhte në botë, siç e argumentoi ai, “ekonomia e hapur influencohet drejpërdrejt nga lëvizjet globale të çmimeve të mallrave apo shërbimeve, sidomos ato që janë të lidhura me nevojat për import siç është energjia elektrike”.
Ai bëri të ditur se brenda një jave kryeministri do të bëjë publike masat e mbrojtjes nga kriza duke theksuar se “… ne do ta mbrojmë konsumatorin familjar dhe sipërmarrjen e vogël nga kriza energjetike, rritja e çmimeve dhe rritja e kostove për shkak të këtyre çmimeve”.
Numri dy i qeverisë nuk solli të dhëna për situatën energjitike të vendit dhe çfarë pritet të ndodhë me çmimin energjisë elektrike, ndërsa Ministrja e Financave dhe Ekonomisë, Delina Ibrahimaj, pranoi se po punohet për të patur një panoramë më të qartë se sa do të jetë kostoja në buxhet e krizës.
“Jemi duke vëzhguar me kujdes se si rritja e çmimit të energjisë apo gazit po ndikojnë në rritjen e çmimeve të produkteve të tjera dhe paketa, e cila do të prezantohet, do të marrë parasysh si efektet direkte edhe efektet indirekte të rritjeve të çmimeve të tjera“, tha Ibrahimaj.
Ajo tha se se kriza “do të impaktojë jo vetëm buxhetin e këtij viti, por edhe atë të vitit 2022”.
Para disa ditësh, kryeministri Edi Rama shpalli një krizë energjetike për Shqipërinë pas një analize gjeostrategjike ndërkombëtare, por duke refuzuar të flasë për gjendjen e menaxhimit të burimeve energjetike në vend apo të koorporatave të shërbimit të energjisë elektrike.