Gjykata e Posaçme për Korrupsionin dhe Krimin e Organizuar ka pranuar kërkesën e SPAK për sekuestrimin e pasurive të Arben Isufajt në kuadër të ligjit “antimafia”, pasi është hetuar nga autoritetet e huaja për trafik narkotikës dhe pjesëmarrje në organizata kriminale.
Prokuroria e Posaçme kundër Korrupsionit dhe Krimit të Organizuar, SPAK njoftoi të mërkurën vendimin për sekuestrimin e pasurive të Arben Isufajt, i njohur ndryshe edhe si “Ben Qimja”. Në njoftimin e SPAK shpjegohet se procedimi pasuror në ngarkim të Isufajt është kryer në fund të muajit maj, mbi bazën e referimit pasuror të dërguar nga Drejtoria Vendore e Policisë Fier.
“[…]Ka rezultuar se shtetasi Arben Enver Isufaj, është subjekt i hetimit pasuror sipas ligjit nr.10192 datë 03.12.2009 ‘Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë’, sipas nenit 3/1 pika “c”, pasi është hetuar nga autoritetet e huaja për vepra penale që lidhen me trafikimin e lëndëve narkotike dhe organizatat kriminale”, i referohet SPAK përmbajtjes së informacionit të dërguar nga policia e Fierit.
Me vendimin e datës 31 korrik Gjykata e Posaçme e Shkallës së Parë ka pranuar kërkesën e SPAK për sekuestrimin e disa pasurive; shoqërive, trojeve dhe automjeteve në pronësi të Isufajt dhe familjarëve të tij.
Më konkretisht, janë sekuestruar: një pulari pjesë e shoqërisë tregëtare “ISUFAJ 2001”, me seli në fshatin në Grizë-Patos; 33% e kuotave të kapitalit të Shoqërisë “AKILI ALB” SHPK, me fushë veprimtarie në prodhimin, tregëtimin dhe përpunimin e produkteve bujqesore e blegtorale, si dhe të fidanëve frutorë; subjekti “ISUFAJ-2004” SHPK me veprimtari në fushën e ndërtimit; truall me sipërfaqe 3289 m2 në qytetin e Fierit; ‘tokë pa frut’ me sipërfaqe 14 mijë m2 në Hasturkas-Fier; dy ngastra ‘tokë arë’ në vendin e quajtur Sheq i Madh në Fier me sipërfaqe 1467 m2 dhe 5600 m2; si dhe 6 automjete, 2 të llojit Audi, tre Mercedes Benz dhe një Daimler Chrysler.
Gjatë operacionit të policisë “Forca e Ligjit” u sekuestruan tre pasuri të tjera të familjes Isufaj – dy njësi në lagjen Sheq i Madh dhe një njësi tjetër në pallatin e quajtur “Kupola” në Fier.
Arben Isufaj ka një të kaluar kriminale në shtetin italian dhe është dënuar nga Gjykata e Torinos për trafik ndërkombëtar lëndësh narkotike. Ai u arrestua për t’u ekstraduar në Itali në mars 2014, por kërkesa e autoriteteve italiane u hodh poshtë nga Gjykata e Rrethit Gjyqësor Fier.
Pasuritë e sekuestruara:
- Objekti “Pulari”, shoqëria tregtare e emërtuar “ISUFAJ 2001”, e përbërë nga një godinë, me objekt të aktivitetit “Rritje dhe tregtim të zogjve të pulës, me shumicë e pakicë”, me seli në fshatin në Grizë-Patos.
- Pjesa takuese 33% e kuotave të kapitalit të Shoqërisë “AKILI ALB” SHPK, me Nipt. L12805404G, me fushë veprimtarie: “Prodhimin, tregtimin dhe përpunimin e produkteve bujqesore e blegtorale, import eksport, prodhim të fidanëve frutorë”, në lagjen “Apollonia” Fier.
- Subjekti “ISUFAJ-2004” SHPK me fushë veprimtarie: “Per zbatim, punime dheu, sistemime, tarracime terrenesh etj, prodhim materiale inerte, rere, çakull, gurë, mermer etj. Ndertime civile dhe ekonomike, ndertim vepra arti, rikonstruksione. Për projektim, plan vendosje objekte të veçanta, projektim i veprave të zakonshme prej murature, tulle, guri etj. Projektim rruge auto kat. V, IV. Projektim vepra arti të vogla, supervizim dhe kolaudim”, në lagjen “Konferenca e Pezës”, Fier.
- Truall me sipërfaqe 3,289.00 m2 në Fier.
- “Tokë pa Frut” me sipërfaqe 1000 m2, në Hasturkas – Fier.
- Pasuri e llojit “Arë”, me sipërfaqe 1.467 m2, në Sheq i Madh – Fier.
- Pasuri e llojit “Arë”, me sipërfaqe 5.600 m2, në Sheq i Madh – Fier.
- Automjet lloji autoveturë, marka AUDI A8.
- Automjeti lloji autoveturë, marka MERCEDES BENZ ML270CDI.
- Automjeti lloji autoveturë, marka MERCEDES BENZ 300D.
- Automjeti lloji autoveturë, marka DAIMLER CHRYSLER S500.
- Automjeti lloji autoveturë, marka MERCEDES BENZ S63 AMG.
- Automjeti lloji autoveturë, marka AUDI A8L.