Mbledhja e Përgjithshme e Gjyqtarëve zgjodhi tre anëtarët e rinj të KLGj-së, gjyqtarët Irena Plaku, Ridvan Hado dhe Klodian Kurushi, të cilët do të zëvendësojnë anëtarët gjyqtarë të Këshillit që u përfundon mandati 3-vjeçar.
Trupa e gjyqtarëve të Shqipërisë u mblodh të premten dhe zgjodhi tre anëtarët e rinj për në Këshillin e Lartë Gjyqësor, KLGj, si dhe anëtarin e Këshillit Drejtues të Shkollës së Magjistraturës.
Tre të zgjedhurit për në Këshillin e Lartë Gjyqësor do të zëvendësojnë anëtarët gjyqtarë të këtij këshilli, të cilët kanë mandate 3-vjeçare që përfundojnë më 12 dhjetor, konkretisht anëtarin Medi Bici nga radhët e Gjykatës së Lartë, Ilir Toskën nga Apeli dhe Brunilda Kadin nga shkalla e parë. Po më datë 12 dhjetor u përfundon mandati edhe dy anëtarëve nga radhët e juristëve të spikatur, Erjon Muharremajt dhe Maksim Qokut, vendet e të cilëve do të plotësohen nga Kuvendi.
Për zëvendësimin e Medi Bicit garuan mes tyre gjyqtarët e Gjykatës së Lartë, Asim Vokshi dhe Klodian Kurushi. Gjyqtarët zgjodhën Kurushin me 145 vota kundrejt 93 votave të marra nga Vokshi.
Gjyqtari i Apelit, Ilir Toska do të zëvendësohet nga gjyqtari Ridvan Hado, i cili mori 140 vota të kolegëve kundrejt 101 votave të mbledhura nga rivalja në garë, Vojsava Osmanaj.
Si përfaqësuese e gjykatave të shkallës së parë në KLGJ u zgjodh gjyqtarja Irena Plaku, e cila mori 158 vota. Kandidatja tjetër, Manjola Xhaxho siguroi 75 vota nga kolegët.
Mbledhja e Përgjithshme e Gjyqtarëve nxorri në pah vakancat e shumta në sistemin e drejtësisë, të shkaktuara nga procesi i vetingut. Nga organika prej 408 gjyqtarësh, aktualisht e ushtrojnë funksionin 263 gjyqtarë dhe ishin të pranishëm në mbledhje 247 prej tyre.
Të tre kandidatët e zgjedhur të premten si anëtarë të KLGj-së janë konfirmuar në detyrë me vendim të formës së prerë.
Nga katër kandidatët për anëtarë në Këshillin Drejtues të Këshillit të Shkollës së Magjistraturës, gjyqtarët Ilir Panda, Irida Kacerja, Florjan Kalaja dhe Genti Dokollari, u zgjodh ky i fundit me 80 vota. Edhe gjyqtari Dokollari është konfirmuar në detyrë me vendim të formës së prerë.
