Një person ka thyer dy zyra të Këshillit të Qarkut në Vlorë dhe dyshohet se ka marrë dokumente për pronat në bregdetin e Dhërmiut.
Dy zyra të Administrimit dhe Mbrojtjes së Tokës në Këshillin e Qarkut Vlorë u thyen dhe u grabitën të martën pas mesnate, ndërsa dyshohet se janë marrë dokumente në lidhje me pronat në bregdet. Bardhyl Gjika, drejtor i drejtorisë së Administrimit dhe Mbrojtjes së Tokës i tha BIRN se një person i pajisur me mjete të forta ka thyer zyrat.
“Ka hyrë nga dritarja te zyra e zëdhënësit dhe pastaj ka dalë nga dera kryesore”, tha Gjika, ndërsa shtoi se zyrat e sulmuara ishin më të rëndësishmet e Këshillit të Qarkut dhe ruanin dokumente origjinale të pronave në bregdet.
Burime nga policia i thanë BIRN se ishin grabitur dosje të pronave të bregdetit që nuk ishin marrë në dorëzim nga arkiva e ASHK- së, për shkak të mangësive. Gjika tha se ende nuk kishte qartësi se çfarë ishte grabitur në zyra. “Menjëherë erdha këtu kam gjetur policinë gjeta rojet dhe po merret policia. Njëkohësisht po bëjmë një inventar për të saktësuar çfarë mungon”, tha ai.
Pronësia në bregdet është burim i vijueshëm konfliktesh në Vlorë. Për shkak të përplasjeve për pronat kryesisht në rivierë ku po ndërtohen ndërkohë një sërë resortesh luksoze Agjencia Shtetërore e Kadastrës në Vlorë ka ndërruar 10 drejtues në dy vitet e fundit.
Oficerë të policisë që kërkuan të mos identifikoheshin thanë se vjedhja kishte ndodhur në jo më shumë se 3 -5 min. Sipas të njëjtit burim në zyrën e administrimit dhe mbrojtjes së tokës, gjatë kontrollit të policisë ka rezultuar se mungojnë 2 dosje të AMT-je të pronave në bregdet, konkretisht në fshatin Dhërmi, Himarë.
Pavarësisht se institucioni ka kamera të sigurisë, ngjarja nuk është regjistruar nga këto të fundit. Autori ka përdorur një kënd tjetër hyrjeje në godinë dhe u është shmangur atyre. Autoritet dyshojnë se autori, ka vepruar i ndihmuar me informacion nga zyrtarë të institucionit dhe ka marrë vetëm një numër dosjesh me interes.