Kryeministri spanjoll Pedro Sanchez ka njoftuar planet e qeverisë për t’u ofruar të rinjve nga 18 deri në 25 vjeç nga 250 euro në muaj për deri në dy vjet, para të cilat ata do t’i shpenzojnë për të paguar qiranë.
Kryeministri spanjoll Pedro Sanchez është i shqetësuar se shumë njerëz jo shumë të rinj vazhdojnë të jetojnë ende me prindërit e tyre në të tridhjetat.
Ai njoftoi të martën më 5 tetor se qeveria e tij planifikon t’u ofrojë të rriturve të moshës 18 deri në 35 vjeç 250 euro në muaj për t’i shpenzuar për qiranë për një periudhë deri në dy vjet. Nisma, e cila është pjesë e një plani më të gjerë strehimi, do të zbatohet për të rriturit që fitojnë më pak se 23,725 euro në vit.
Sanchez tha se ai dëshiron që të rinjtë “të kenë qasje në banesa të mira me qira”.
Të rinjtë në vende përfshirë Italinë dhe Greqinë kanë tendencë të largohen nga shtëpia rreth moshës 30 vjeç. Ashtu si Spanja, edhe këto vende kanë norma relativisht të larta të NEET – pra, të rinj që nuk janë as të punësuar as në arsim ose trajnim. Vitin e kaluar 22.3% e të rriturve spanjollë të moshës 20-34 vjeç nuk ishin të punësuar ose të regjistruar në një program arsimor, sipas Eurostat, krahasuar me mesataren 17.6% të BE-së.
Papunësia e lartë shoqëron rritjen e qirasë
Tregu i punës në Spanjë u godit rëndë nga pandemia dhe shkalla e papunësisë së të rinjve është aktualisht 38%, shumë mbi mesataren kombëtare dhe më e larta në BE që nga qershori.
Në të njëjtën kohë, tregu i qirasë në vend po zvogëlohet. Numri i shtëpive të reja ra nga 850,000 në 100,000 midis 2006 dhe 2018, sipas një raporti të prillit nga Instituti Brookings, dhe shumica e popullsisë e ka në pronësi, në vend që të ketë me qira, shtëpinë. Oferta e ulët, e shoqëruar me një kërkesë të lartë ka bërë që qiratë të rriten, veçanërisht në qytetet kryesore si Madridi dhe Barcelona, duke e bërë më të vështirë që të rinjtë të kursejnë sa duhet për të dalë të jetojnë vetëm.
Qeveria e Spanjës njoftoi në fillim të këtij viti se do të investojë 1 miliardë euro nga fondet e BE-së për rimëkëmbjen nga koronavirusi në banesa sociale. Ky projektligj i fundit zgjerohet në përpjekjet për ta bërë strehimin më të arritshëm dhe të përballueshëm, ndërsa adreson faktin se dalja në një shtëpi me qira vazhdon të mbetet ende një ëndërr e madhe për shumë nga të rinjtë e vendit.
Marrë me autorizim nga Weforum.org Spanish government announces plan to help young adults move out
