Opozita dhe mazhoranca miratuan me konsensus një rregullore të re të premten, duke zhbllokuar ngërçin në komisionin hetimor për zgjedhjet.
Komisioni hetimor për zgjedhjet e 25 prillit u zhbllokua të premten, pas debateve proceduriale që shoqëruan 4 mbledhjet e mëparshme. Anëtarët e opozitës dhe të mazhorancës miratuan me konsensus një rregullore të re, duke bërë nul votimin në parim për draftrregulloren e parë për të cilin nuk ranë dakord në formulimin e neneve.
Konsensusi për këtë çështje mes anëtarëve të PD-së dhe PS-së në komision u kritikua nga deputeti i Lëvizjes Socialiste për Integrim, Petrit Vasili, i cili e cilësoi “pazari i gjësë”.
“Nuk jemi këtu ne për të akomoduar psikopatira. Është vazhdim jo shqyrtim. Keni frikë nga kjo?”, tha ai.
Kryetari i Komisionit, Enkelejd Alibeaj, e cilësoi vendimin e tij një “gjest kalorsiak” në funksion të konsensusit. “Nuk ka lidhje me frikën, ka të bëjë me gjetjen e një gjuhe të përbashkët,” iu përgjigj ai Vasilit.
Miratimi i një dokumenti pune më në fund i ka hapur rrugë veprimeve të mëtejshme për hetimin e zgjedhjeve. Partia Demokratike, si inciatore e këtij komisioni, nuk ka humbur kohë, por ka nisur 21 kërkesa në drejtim të institucione të drejtësisë, institucioneve të pavarura, krerët e qeverisjes qendore dhe lokale, etj. Përmes tyre, PD kërkon informacione për krimet zgjedhore dhe përdorimin e burimeve shtetërore në fushatë.
Pyetjet e ngritura për institucionet kërkojnë të nxjerrin të dhëna për krimet zgjedhore të kallëzuara dhe të hetuara, nxjerrjen e përgjegjësive institucionale për daljen e të dhënave personale të zgjedhësve, punësimet elektorale, shpërndarjen e lejeve të legalizimit, bonuset e tërmetit apo përfitime të tjera nga Buxheti i shtetit për periudhën janar-prill 2021.
Demokratët kanë përfshirë në listën e tyre edhe Shërbimin Informativ Shtetëror, nga i cili kërkojnë informacion nëse janë konstatuar elementë të krimit të organizuar të përfshirë në fushatë zgjedhore.
Një prej kërkesave i dërgohet edhe kryeministrit Edi Rama në funksion të detyrës si kryetar i Këshilltit Kombëtar të Territorit, ku i kërkohen të dhëna për lejet e ndërtimit që janë dhënë në të gjitha bashkitë në periudhën parazgjedhore.
Deri më 14 nëntor, komisioni do të presë kërkesat nga anëtarët e mazhorancës në funksion të hetimit të zgjedhjeve.