SPAK akuzon për shpërdorim detyre dhe favorizim në tendera, anëtarët e grupit të specifikimeve teknike dhe të KVO-së së Bashkisë Durrës për një tender me vlerë 7 milionë lekë për blerjen e autoshkallëve për zjarrfikësit.
Prokuroria e Posaçme Kundër Korrupsionit dhe Krimit të Organizuar, SPAK njoftoi të premten arrestimin e gjashtë punonjësve të Bashkisë Durrës dhe dy punonjësve të dy kompanive private, të cilët akuzohen se kanë zhvilluar një procedurë prokurimi me dokumente të falsifikuara.
Gjithashtu, janë caktur masat e sigurisë ‘arrest në shtëpi’ dhe ‘detyrim paraqitje’ edhe për dy punonjës të tjerë të kompanive.
Sipas njoftimit të SPAK, paligjshmëritë janë kryer gjatë procedurës së tenderit në qershor 2020 për blerjen e autoshkallëve për shërbimin e Mbrojtjes nga Zjarri dhe për Shpëtimin në Bashkinë Durrës, me vlerë të fondit limit prej 7 milionë lekë pa TVSH.
Sipas SPAK, anëtarët e grupit të specifikimeve teknike dhe përllogaritjes së vlerës së fondit limit, kanë kryer shkelje ligjore në “shpërdorim të detyrës”, ndërsa anëtarët e Komisionit të Vlerësimit të Ofertave pranë kësaj bashkie akuzohen për veprën penale të “Shkeljes së barazisë së pjesmarrësve në tendera apo ankande publike”.
Prokuroria ngre gjithashtu dyshime se adminsitratorë, ortakë e punonjës të shoqërive R&R Group sh.p.k. dhe Klosi – R Company sh.p.k., kanë dorëzzuar dokumente të falsifikuara në kuadër të kësaj procedure prokurimi dhe ka filluar procedimin për katër prej tyre. Procedimi për falsifikim është regjistruar edhe për dy kompanitë në fjalë.
Gjykata e Posaçme e Shkallës së Parë për korupsionin dhe Krimin e Organizuar ka caktuar masën e sigurisë “arrest në burg” për të gjithë punonjësi e Bashkisë Durrës, ndërkohë që masa më të buta sigurie janë caktuar për dy punonjës të kompanive private.
Sipas SPAK, ekzekutimi i masave të sigurisë është mundësuar të premten, më 29 tetor.
