Prokuroria e Posaçme kundër Korrupsionit dhe Krimit të Organizuar njoftoi se kishte ngritur akuzë e marrë si të pandehur kryebashkiakun socialist të Mallakastrës Qerim Ismailaj, për mosdeklarimin e një dënimi në Greqi në formularin e dekriminalizimit.
Prokuroria e Posaçme kundër Korrupsionit dhe Krimit të Organizuar njoftoi të hënën se kishte dërguar në gjykatë çështjen ndaj kryebashkiakut socialist të Mallakastrës Qerim Ismailaj, për mosdeklarimin e dënimit në Greqi në formularin e dekriminalizimit.
“Prokuroria e Posaçme është dërguar kërkesa për gjykimin e çështjes pranë Gjykatës së Posaçme të Shkallës së Parë kundër Korrupsionit dhe Krimit të Organizuar Tiranë, në ngarkim të të pandehurit Qerim Ismailaj, me funksion Kryetar i Bashkisë Mallakastër, për kryerjen e veprës penale “Falsifikimi i vulave, i stampave ose i formularëve””, thuhet në njoftimin e SPAK.
Ismailaj rezultoi i dënuar me tre vite burg në Greqi për një sherr të dhunshëm të ndodhur në vitin 2000. Ai nuk e ka vuajtur dënimin ndërsa u zgjodh kryebashkiak për Partinë Socialiste në zgjedhjet pa garë të vitit 2019. Këtë dënim ai rezultoi se nuk e kishte deklaruar në formularin e dekriminalizimit.
Megjithatë në korrik Komisioni Qendror i Zgjedhjeve vendosi të mos i ndërpresë mandatin kryebashkiakut socialist të Mallakastrës Qerim Ismailaj, duke pranuar arsyetimin e Ismailajt se ai nuk kishte qenë në dijeni të dënimit.
Ndryshe nga ky qëndrim i KQZ, SPAK beson se mosdeklarimi i dënimit përbën vepër penale. “Shtetasi Qerim Ismailaj, ka konsumuar elementët e veprës penale të parashikuar nga neni 190, paragrafi i parë i Kodit Penal, e për rrjedhojë, i është komunikuar akuza, është marrë me cilësinë e të pandehurit dhe janë përfunduar hetimet”.
Ismailaj nuk qe i arritshëm për koment. Ai sëbashku me disa kryebashkiakë dhe kandidatë për kryebashkiakë nga radhët e Partisë Socialiste u denoncuan nga opozita për mosdeklarim të dënimeve jashtë vendit, bazuar në ligjin e vitit 2016 për pastrimin e politikës nga persona të dënuar për krime.
Si pjesë e ligjit, të gjithë kandidatët për poste politike, të tilla si kryebashkiakët apo deputetët, si dhe një numër zyrtarësh të administratës publike dhe drejtësisë, duhet të plotësojnë një formular ku të përshkruajnë në detaje problemet me drejtësinë në të shkuarën. Disa deputetë dhe kryebashkiakë kanë humbur mandatet pasi kanë dështuar të deklarojnë këto probleme.
Pavarësisht miratimit të ligjit, një numër personash me probleme me drejtësinë vijuan të kandidojnë duke shpresuar se do t’i shpëtojnë kontrolleve. Pas zgjedhjeve të vitit 2019, Valdrin Pjetri, i zgjedhur kryebashkiak i Shkodrës për Partinë Socialiste, u detyrua të japë dorëheqjen pasi u zbulua se kishte qenë i dënuar për drogë në Itali. Po kështu, i zgjedhuri si kryetar Bashkie i Vorës Agim Kajmaku u shkarkua pasi rezultoi me probleme të pambyllura me drejtësinë greke, për të cilat më pas u shpall i pafajshëm.
