Projektimi i shtatë kontratave të reja koncesionare me një vlerë të përllogaritur në 214 miliardë lekë shkaktoi diskutime në komisionin e Ekonomisë, ku ministrja Delina Ibrahimaj tha se ato janë ‘lista potenciale’, ende pa efekt në buxhet.
Qeveria shqiptare projekton dhënien e 7 koncesioneve të reja me një vlerë të parashikuar prej 214 miliardë lekësh [1.7 miliardë euro], sipas të dhënave të projekt-buxhetit për vitin 2022, që u prezantuan të hënën në komisionon parlamentar për Ekonominë dhe Financat.
Projektet më të kushtueshme të partneritetit publik-privat parashikohen të jenë segmenti rrugor Milot–Fier me një vlerë të përllogaritur në 178 miliardë lekë si dhe mbikëqyrja e qendrave të kontrollit teknik të automjeteve me vlerë rreth 20 miliardë lekë.
Projektet e tjera që mund të aktivizohen vitin e ardhshëm janë ndërtimi i aeroportit të Sarandës dhe e portit të integruar “Triport Vlorë”, çelësat publikë PKI, rritja e sigurisë rrugore si dhe një koncesion lokal për përmirësimin e infastrukturës në disa lagje të Elbasanit.
Anëtarët e komisionit të Ekonomisë i kërkuan sqarime ministres së Ekonomisë dhe Financave, Delina Ibrahimaj për 7 kontratat e reja koncensionare të parashikuara, ndërsa ajo i konsideroi ato si potenciale dhe ende ‘pa efekte buxhetore’.
“Lista me 7 koncensione tek lista e kontratave koncensionare janë lista potenciale, që mund të fillojnë gjatë vitit në vijim. Janë publikuar për arsye të transparencës dhe disiplinimit të praktikave buxhetore,” tha Ibrahimaj.
“Kjo listë ka qenë e njëjtë dhe në vitin 2021 dhe jo domosdoshmërisht lista e paraqitur do të fillojë dhe do të bëhet pjesë e buxhetit,” shtoi ajo.
Kryetari i komisionit, Eduart Shalsi, e pyeti ministren e Financave specifikisht për dy projekte koncesionare, ndërsa deputeti Erjon Braçe kërkoi sqarime për vlerën totale që i kushtojnë buxhetit të shtetit kontratat e Partneritetit Publik-Privat.
Sipas Braçes, në këtë aspekt ka abuzime të mëdha dhe për këtë shkak “duhet të bëhet transparencë nga qeveria”.
Ibrahimaj tha se janë 13.82 miliardë lekë të parashikuara për pagesat e 13 kontratave koncesionare që janë aktualisht në funksion.
“Pagesat janë në rënie,” tha ministrja.
Deputetët e opozitës ngritën pyetje mbi shpenzimet e qeverisë me krijimin e tre agjencive të reja dhe 4 ministrive pa portofol.
“Këto janë rritje shpenzimesh të pakontrolluara,” tha deputetja Jorida Tabaku. Por sipas ministres Ibrahimaj, këto agjenci kanë një staf aktual dhe më pas do të bëhet llogaritja e kostove të stafit të ri, por buxheti i tyre do të jetë i përafërt me ato të vitit 2021.
“Këto janë procese buxhetore normale”- tha Ibrahimaj.
Projekt-buxheti 2022 do të diskukutohet gjatë muajit nëntor në të gjitha komisionet e Kuvendit bashkë me Paketën Fiskale.
