Komisioni hetimor për zgjedhjet e 25 prillit nuk ka marrë përgjigje për 61 kërkesa dërguar institucioneve të ndryshme. Kryetari Alibeaj e cilësoi shkelje ligjore dhe paralajmëroi padi penale. PS propozoi tu jepej më shumë kohë në dispozicion.
Hetimi parlamentar i zgjedhjeve të 25 prillit hasi një ngërç të ri të mërkurën, pasi nuk ka ardhur asnjë përgjigje nga institucionet për pyetjet e ngritura nga anëtarët e komisionit në funksion të hetimit. Në komision kishte mbërritur vetëm një përgjigje nga Partia Demokratike në lidhje me pyetjet e shtruara nga socialistët për funksionimin e “strukturave të mbrojtjes së votës”.
Mbledhja e parashikuar për administrimin e të dhënave nga institucionet është kthyer në një debat mes palëve për masat që duheshin marrë për shkak të shkeljeve të afateve ligjore 5-ditore nga këto institucione.
Kryetari Enkelejd Alibeaj e cilësoi shkelje të rëndë ligjore dhe paralajmëroi padi penale për drejtuesit e institucioneve, ndërsa socialistët kërkuan që t’u jepej më shumë kohë në dispozicion.
Kërkesat ishin drejtuar bashkive, SPAK, drejtorisë së Policisë së Shtetit, inspektoriateve, Kadastrës, ministrive, Gjendjes civile, drejtorive shtetërore si OSHE, KESH, Posta Shqiptare, SHISH, etj..
“Përballë një fakti të tillë për mosrespektim të urdhërimeve të këtij Komisioni, që në fakt janë urdhërime të ligjit, unë jam i detyruar të ribëj një njoftim për secilin prej këtyre institucioneve, por bashkë me të, edhe për t’i paralajmëruar për kallëzim penal, për shpërdorim detyre secilin prej drejtuesve të këtyre institucioneve”, tha Alibeaj.
“Nuk dua të besoj se është një skenar për të penguar hetimin”- shtoi ai duke i kërkuar publikisht kryeministrit Edi Rama që të ushtrojë autoritetin e tij ndaj institucioneve në varësi që të kthejnë përgjigje.
Por sipas anëtarëve socialistë kjo nuk ka qenë e qëllimshme, por ka ndodhur pasi informacioni i kërkuar është voluminoz.
Zv/kryetari i komisionit, Toni Gogu kërkoi që t’u lihej dhe disa ditë afat për të sjellë provat e kërkuara. Sipas tij komisioni do të marrë masa “nëse konstatojmë që ka vonesa të qëllimshme, por deri tani nuk ka një indicje të tillë”.
Ndërsa Klotilda Bushka tha se “nuk duhet të ushtrojmë presion mbi instuticionet” duke e cilësuar të ekzgjareruar reagimin e Alibeajt.