Mbledhja e Posaçme e drejtuesve të IAL-ve për përzgjedhjen e kandidatëve për KLGJ dhe KLP u përsërit të hënën pas një vendimi të Gjykatës Administrative të Apelit, që e cilësoi përjashtimin e njërit prej kandidatëve të kundraligjshëm.
Drejtuesit e Institucioneve të Arsimit të Lartë dhe të Shkollës së Magjistraturës u mblodhën për herë të dytë të hënën në mbledhjen e posaçme për zgjedhjen e kandidatëve për anëtarë të Këshillit të Lartë të Prokurorisë dhe të Këshillit të Lartë Gjyqësor nga trupa e pedagogëve.
Shkak për përsëritjen e procedurës u bë një vendim i Gjykatës Administrative të Apelit, që e cilësoi në shkelje të ligjit përjashtimin e kandidatit Indrit Shtupi, i cili mungonte për arsye shëndetësore në mbledhjen e datës 12 tetor, gjatë prezantimit të platformave të kandidatëve.
Shtupi, i cili kandidonte për anëtar të KLGJ dhe KLP, ankimoi vendimin e Mbledhjes së Posaçme dhe gjykata i dha të drejtë duke argumentuar se “nuk është zbatuar e drejta për një proces të rregullt ligjor”. Në vendimin e gjykatës sillet si argument një precedent i ngjashëm nga mbledhja e shtatorit 2017 të trupës së pedagogëve, ku kandidatët në mungesë u vlerësuan dhe u votuan mbi bazën e platformave të paraqitura prej tyre.
Gjatë mbledhjes, kandidati Shtupi prezantoi platformën e tij për KLGJ dhe KLP dhe iu përgjigj pyetjeve të pedagogëve.
“Arsyet e kandidimit tim lidhen me formimin tim si pedagog dhe si jurist,” tha ai, duke shtuar se nëse do të zgjidhej në njërin prej këshillave do të kontribuonte për kthimin e besimit të qytetarëve tek institucionet e drejtësisë. “Qytetarët ndihen të lodhur nga zgjatja e proceseve hetimore dhe gjyqësore,” tha ai, duke parë si zgjidhje shtimin e numrit të gjyqtarëve dhe prokurorëve.
Rektori i Universitetit të Tiranës, Artan Hoxha, në cilësinë e drejtuesit të mbledhjes së posaçme sqaroi se përjashtimi i Shtupit nuk ishte subjektiv, por në zbatim të ligjit. “Ka pasur korrektesë në zbatimin e ligjit, edhe sot po të mos kishit ardhur, nuk do të ishit vlerësuar dhe ky organ do të mbante të njëjtin qëndrim,” tha ai. Kandidati tha se nuk e komentonte vendimin e gjykatës.
Pas një vendimmarrje me dyer të mbyllura, organi kolegjial i pedagogëve vendosi që të ripërsërisë votimin pjesërisht duke hedhur në votim vetëm kandidatët që vinin nga universitetet private, listë ku bënte pjesë edhe kandidati Shtupi.
Në fund të votimit të fshehtë, Shtupi mori 6 vota si kandidat për KLGJ-në dhe asnjë votë për KLP-në.
Referuar edhe rezultateve të votimit të mëparshëm, zyrtarisht kandidatë për 2 vende vakante për Këshillin e Lartë Gjyqësor janë; Artan Koçi nga Universiteti i Tiranës (UT), Endri Papajorgji nga Tirana Business University, Ilir Rusi nga UT, Orjona Muçollari nga UT, Yllka Rupa nga Universiteti “Luigj Gurakuqi” dhe Indrit Shtupi nga Universiteti Mesdhetar. Për Këshillin e Lartë të Prokurorisë kandidatë janë; Artan Koçi dhe Mirela Bogdani nga Shkolla e Magjistraturës, Yllka Rupa, Endri Papajorgji dhe Saimir Vishaj, i propozuar nga Universiteti “Luarasi”.
Kuvendi do të votojë në seancë plenare për të zgjedhur mes 8 kandidatëve zyrtarë, katër anëtarët e rinj për institucionet e drejtësisë.
