Këshilli i Lartë Gjyqësor dëgjoi kërkesën e ILD për masë disiplinore me ulje 40 për qind të pagës ndaj gjyqtares Pajtime Fetahu. Gjyqtarja kundërshtoi pretendimet se kishte bërë shkelje dhe këmbënguli se sjellja e saj ishte diktuar nga një provokim.
Këshilli i Lartë Gjyqësor dëgjoi të martën argumentet e Inspektorit të Lartë të Drejtësisë dhe kërkesën e tij për masë disiplinore me ulje 40 për qind të pagës ndaj gjyqtares Pajtime Fetahu. Inspektori Artur Metani tha në seancë se masa ndaj Fetahut kërkohej pasi ajo akuzohej se kishte “cënuar figurën e gjyqtarit” dhe “paanshmërinë në gjykim” duke komunikuar me palët në proces jashtë seancës gjyqësore.
Metani iu referua një video të transmetuar në emisionin “STOP” në TV KLAN, në të cilën Fetahu shfaqet duke diskutuar me një person që prezantohet si i afërmi i një personi që ajo kishte nën gjykim. Gjatë diskutimit Fetahu i thotë personit në fjalë se kishte prej saj “predispozitë pozitive” në lidhje me kohën kur do të zhvillohej gjyqi dhe mbi vendimin. ILD pretendon se shkelja është me dashje direkte.
Në prapësimet e saj gjyqtarja Fetahu ishte emocionale. Ajo tha se ndjehej shumë keq që ishte para KLGJ-së për procedim disiplinorë dhe pretendoi se kishte 5 vjet që intimidohej nga emisioni “STOP”. Ajo dha një version të ngjarjes që sipas saj nuk është transmetuar në televizion dhe këmbënguli se ishte provokuar nga personi që bëri regjistrimin. Gjyqtarja tha se kishte fiksuar se edhe pse pretendoi se ishte një çështje për vëllain, personi në fjalë përmendi emër tjetër. Ajo tha se ishte përpjekur të ishte e sjellshme dhe të ulte tensionin, pasi personat kishin krijuar rrëmujë në korridoret e gjykatës. Sipas saj vendimi janë të cilin i pandehuri i akuzuar për dhunë në familje nuk ishte favorizuar prej saj, tregonte se komunikimi kishte qenë vetëm për mos vijuar debatet me personin që bënte regjistrimin.
Fetahu tha se pavarësisht se kishte bërë kallëzim ndaj emisionit për intimidim e të tjera, kolegët e saj kishin vendosur mosfillim të çështjeve. “Kanë frikë kolegët e mi”, duke nënkuptuar prokurorët. Fetahu po ashtu pretendoi se çështja ishte parashkruar, por ia la në dorë KLGJ-së që të vendoste. “Vlerësojeni (nëse është shkelje), më jepni dënimin e merituar”, tha ajo.
Ajo këmbënguli se cilado sjellje e saj në situatën e krijuar, edhe nëse do kishte thirrur policinë apo mbyllur derën do ishte përcjellë njësoj si shkelje etike.
Në të njëjtën seancë u mësua se ILD ishte duke e hetuar gjyqtaren edhe për një çështje tjetër. Metani tha se kjo çështje e dytë ishte ende në hetim. Ndërkohë në seancën e dytë u vendos shtyrja e procesit ndaj gjyqtarit Rexhep Karaj, pasi ky i fundit kishte raportuar pamundësi të ishte i pranishëm edhe për shkak se kishte një seancë dëgjimore në KPK.
