Një grup prej 120 qytetarësh u bënë pjesë e një ushtrimi mbi demokracinë debatuese dhe ndikimin që vetë ata duhet të kenë mbi axhendën parlamentare dhe çështje të tjera politike në vend.
Për herë të parë në Shqipëri, 120 qytetarë të përzgjedhur në mënyrë rastësore nga një kampion prej 1200 qytetarësh të anketuar paraprakisht, po marrin pjesë nga data 18 nëntor në një ushtrim të demokracisë debatuese.
Aktiviteti është titulluar “Shqipëria n’Kuvendim” dhe po organizohet nga Instituti për Demokraci dhe Ndërmjetësim, me mbështetjen e Agjencisë Zvicerane për Zhvillim dhe Bashkëpunim (SDC) dhe Ambasadës së Zvicrës në Shqipëri.
Pjesmarrja e qytetarëve në mbikëqyrjen parlamentare, demokracia e brendshme e partive politike, reforma e sistemit zgjedhor por edhe çështje si mbrojtja e mjedisit apo emigrimi ekonomik janë disa nga temat që po diskutohen.
Rinor Beka nga NDI Albania tha se ky ushtrim i demokracisë debatuese krijon hapësirë që qytetarët të mund të diskutojnë çështje sensitive të vendit, nën kushtet e duhura dhe në një mënyrë sfiduese, por të kulturuar.
“Ne kemi punuar në dy drejtime”, tha Beka. “Nga njëra anë kemi punuar me parlamentin për të përforcuar mekanizmat e ndikimit të qytetarëve në legjislacion, dhe nga ana tjetër kemi punuar me vetë qytetarët për t’i inkurajuar ata të kenë ndikimin e tyre në axhendën parlamentare,” tha ai.
Adrian Maître, ambasadori i Zvicrës në Shqipëri solli shembullin e përfshirjes qytetare nëpërmjet një referendumi, që së fundmi është duke u përdorur për vendimarrje politike në Zvicër.
“Më 28 nëntor në Zvicër do të ketë një votim popullor mbi një çështje të rëndësishme politike që është kërkuar prej stafit të kujdesit shëndetësor të infermierëve,” tha ambasadori, duke shpjeguar rolin e qytetarëve në vendimarrje.
Edhe Kryetarja e Kuvendit, Lindita Nikolla tha gjatë ceremonisë së hapjes të enjten në mbrëmje se qytetarët janë aleatët më të fortë të demokracisë.
“Demokracia debatuese është një koncept modern. Pjesmarrja e qytetarëve në këtë proces demokratik është thelbësor,” tha Nikolla. “E konsideroj këtë ushtrim edhe një ‘agorà’ të demokracisë shqiptare, ku qindra vajza e djem do të kenë mundësinë të shprehin pikëpamjet, qëndrimet, shprehitë dhe argumentet dhe kundërargumentet e tyre, duke kontribuar në konsolidimin e kulturës demokratike në Shqipëri,” shtoi ajo.
Ushtrimi i demokracisë debatuse synon që qytetarët të ndërveprojnë me njëri-tjetrin për të shkëmbyer mendime dhe këndvështrime të ndryshme, duke përfituar edhe nga përvoja e ekspertëve të fushës.