Komisioneri Shtetëror i Zgjedhjeve, Iliran Celibashi, vendosi të bëjë kallëzim penal për 67 numërues votash dhe 20 shtetas që kanë rezultuar votues në 2 qendra të ndryshme votimi. Ai rekomandoi masa administrative dhe për 32 sekretarë zgjedhorë.
Komisioni Qendror i Zgjedhjeve miratoi të premten raportet e verifikimit paszgjedhor për 10 për qind të qendrave të votimit për zgjedhjet parlamentare të mbajtura më 25 prill 2021.
Pas shqyrtimit të gjetjeve të procesit të këqyrjes paszgjedhore të fletëve të votimit, Komisioneri Shtetëror i Zgjedhjeve, Iliarian Celibashi, bëri të ditur se do të dërgojë para prokurorisë 67 numërues votash, pasi u konstatuan shkelje në numërimin e votave për kandidatët.
“Në total janë 67 anëtarë të grupeve të numërimit, emrat e të cilëve do të referohen në organin e prokurorisë. Të gjitha shkeljet që i kemi vlerësuar si shkelje penale, kanë të bëjnë me diferenca në fletët e votimit, apo në rezultatin e votimit për kandidatin, jo për partinë”- tha Celibashi për mediat pas seancës publike.
KQZ e konsideron jashtë kompetencave të saj që të hetojë dhe të verifikojë përgjegjësit për këto parregullsi, kështu që është kërkuar ndjekje penale për të gjithë anëtarët e grupeve të numërimit. “Do i takojë organit të prokurorisë për të parë nëse janë të 4 anëtarët e grupit përgjegjës, apo vetëm njëri prej tyre”- tha Celibashi.
Në raportin e gjetjeve nga grupet e numërimit vihet re që disa kandidatëve u janë hequr votat dhe disave u janë shtuar. Ndryshime në vota janë konstatuar edhe për subjektet partiake, por sipas raportit “marzhi i gabimit nuk ka ndikuar në ndryshimin e rezultatit të zgjedhjeve”.
Celibashi vendosi të referojë për ndjekje penale edhe 20 shtetas, të cilët kanë kryer votim të shumëfishtë sipas gjetjeve të procesit të kryqëzimit të të dhënave. “Janë 20 raste ku kemi parë votim të shumëfishtë”- tha komisioneri duke shtuar se bëhet fjalë për 2 qendra votimi.
Pasi shqyrtoi raportin me gjetjet dhe problematikat e konstatuara, KSHZ vendosi gjithashtu t’i kërkojë Komisionit të Ankimimeve dhe Sanksioneve vendosjen e sanksioneve administrative ndaj 32 sekretarëve të komisioneve të qendrave të votimit, të cilët sipas listës janë 17 të Partisë Socialistë dhe 14 të Partisë Demokratike. Sekretarët kanë shkelur rregullat e administrimit të materialeve zgjedhore.
“Kundër këtij vendimi mund të bëhet ankimim pranë KAS”- njoftoi Celibashi.
Verifikimi paszgjedhor në 519 Qendra Votimi të zgjedhura në mënyrë rastësore, tregoi se si komisionerët partiak kanë tjetërsuar votat për kandidatët për deputetë, që ishin të vlefshme për rankimin brenda listës së subjektit të tyre politik, ose siç u pagëzua si “lista e hapur”. Diferenca deri në 20 vota është cilësuar në raport si gabim njerëzor, ndërsa në 19 qendra numërimi diferencat luhateshin nga 21 deri në 76 vota.
Veirifikimi u bë dhe për saktësinë e votimit e numërimit elektronik që u zbatua si projekt pilot në zgjedhjet e fundit. Komisioni Qendror i Zgjedhjeve rekomandon përdorimin e votimit elektronik në një masë më të gjërë pas verifikimit dhe kryqëzimit të të dhënave midis votave fizike të gjetura në kuti dhe rezultatet e sistemit PEVN, ku sipas raportit, “nuk u konstatua asnjë diferencë apo parregullsi”
