Gazetarja e televizionit Fax News, Besarta Demushaj, denoncoi të mërkurën dhunën fizike dhe verbale të ushtruar ndaj saj nga dy shtetas gjatë kohës që ajo po ushtronte punën e saj si gazetare.
Demushaj i tha BIRN-it se ajo ishte nisur për të raportuar lidhur me denoncimin e një qytetareje në konflik pronësie me ndërtuesit e një pallati në pronën e saj, por kur ka mbërritur në objekt dy persona që janë paraqitur si pronarët e objektit e kanë dhunuar fizikisht.
“Një zonjë kërkoi të bënte një denoncim për redaksinë e Fax News lidhur me dyqanin e saj në rrugën Hoxha Tahsim,” tha Demushaj.
“Kur grupi ynë i xhirimit mbërriti pranë objektit, dhe u futëm brenda dyqanit ndërtuesi Tahir Numani dhe kunati i tij tentuan të na pengojë duke na dhunuar fizikisht dhe me fjalor banal”, shtoi ajo.
Pas denoncimet të ngjarjes nga gaztarja, policia e shtetit njoftoi procedim penal ndaj dy të dyshuarve, të cilet po ndiqen në gjendje të lirë.
Gazetarët përballen shpesh me incidente të dhunshme gjatë punës së tyre të përditshme dhe në shumicën prej tyre janë punonjës të shtetit, Gardës së Republikës apo Policisë së Shtetit që janë përfshirë në akte dhune.
Demushaj sqaroi se u ka bërë të ditur profesionin e saj, por kjo gjë nuk e ka ndaluar dhunën me pretendimin se “ka hyrë në pronë private”.
“Unë u prezantova si gazetare dhe i bëra të ditur zotërinjve se po bëja detyrën time, por ata filluan menjëherë dhunën,” tregoi ajo.
“Kur na mbyllën brenda në dyqan nuk kemi mundur t'i xhirojmë, por kemi filmime se si na dhunonin, mua dhe operatorin, në ambjentin jashtë”- shtoi Demushaj, e cila ka publikuar video nga skena në televizionin ku punon.
Ajo e quan ngjarjen një “cënim të ushtrimit të profesionit”, por nga ana e tjetër edhe si “një shtysë që të vijojë me përkushtim punën”.
