Komisioni i Ankimimeve dhe Sanksioneve rrëzoi të martën një sanksion administrativ ndaj njërit prej administratorëve në Tiranë për përdorimin e aseteve publike për fushatë elektorale.
Komisioni i Ankimimeve dhe Sanksioneve, KAS, rrëzoi të martën kërkesën e Komisionerit Shtetëror të Zgjedhjeve, Ilirian Celibashi për vendosjen e një gjobe prej 5 mijë lekësh ndaj Florian Pullazit, administrator i Njësisë Administrative nr. 2 në Tiranë për shkelje të Kodit Zgjedhor.
Masa administrative ishte vendosur pas shfaqjes me foto dhe video të kryebashkiakut të Tiranës, Erion Veliaj duke bërë fushatë përkrah kandidatit Alqi Bllako në ambientet e një biblioteke publike në njësinë nr.2 në Tiranë.
Celibashi i vlerësoi të mjaftueshme provat e ‘Qendresës Qytetare’, duke konkluduar se Bashkia Tiranë ka shkelur ligjin në vendosjen e një biblioteke publike në funksion të fushatës elektorale të kandidatit për deputet të PS-së. Por sipas vendimit të KAS, administratori Pullazi nuk është personi ligjërisht përgjegjës për organizimin e aktiviteteve të ndryshme në bibliotekën e kësaj njësie.
KAS vlerësoi se “është detyrë e Komisionerit që të përcaktojë qartë personat përgjegjës për shkeljen konkrete të ligjit, të konstatuar nga hetimi i bërë nga Komisioneri, dhe të riparaqesë në KAS, nëse e konsideron të arsyeshme një propozim konkret për sanksion administrativ për personat realisht përgjegjës”.
Gjatë dëgjesës, administratori Pullazi tha se edhe pse biblioteka ndodhej në zonën që administron ai, nuk ishte ai përgjegjës direkt për përdorimin e saj për aktivitete publike, por një drejtori e posaçme në bashkinë e Tiranës.
Rigels Xhemollari, drejtor ekzekutiv i organizatës “Qëndresa Qytetare”, e cila denoncoi këtë shkelje të kodit zgjedhor, i tha BIRN-it se “procedura që u ndoq ishte jo korrekte dhe e qëllimtë për të shmangur përgjegjësinë”. Sipas Xhemollarit, “komisioneri duhej të kishte marrë informacion pranë Bashkisë për të kuptuar se cili është personi përgjegjës për bibliotekën”.
Në shkurt të këtij viti, Celibashi gjobiti me 75 mijë lekë kryebashkiakun Veliaj për shpërdorim të postit gjatë fushatës elektorale, por edhe në këtë rast, KAS e shfuqizoi vendimin.
