Lulzim Basha thirri të hënën një mbledhje të kryesisë së Partisë Demokratike që zgjati më shumë se 9 orë, ku u vendos përjashtimi përgjithmonë nga anëtarësimi në parti i ish-kryetarit Sali Berisha me motivacionin e “nxitjes së dhunës dhe urrejtjes në protestën e 8 janarit”.
Basha nuk u kursye as me deputetët e tij, duke përjashtuar katër prej tyre dhe duke pezulluar me kusht që të distancohen nga Berisha edhe gjashtë të tjerë.
Kryesia e PD-së vendosi përjashtimin nga PD dhe nga të gjitha funksionet drejtuese apo anëtarësinë në grupin parlamentar për 8 anëtarë të saj; Sali Berisha, Flamur Noka, Edmond Spaho, Albana Vokshi, Bujar Nishani, Arben Ristani, Rigels Muçollari, Keltis Kruja dhe Klevis Balliu.
Për 19 demokratë të tjerë, kryesia ka vendosur pezullimin e tyre nga anëtarësia në PD dhe funksionet që mbajnë “deri në distancimin e plotë dhe publik nga aktet e dhunës ndaj Partisë Demokratike, dhe veprimeve që dëmtojnë interesat elektorale apo politike të Partisë Demokratike”.
Ata janë; Agron Shehaj, Aldo Bumçi, Belind Këlliçi, Blendi Himçi, Çlirim Gjata, Edi Paloka, Edit Harxhi, Eno Bozdo, Ervin Minarolli, Genc Deromemaj, Genc Pollo, Gent Strazimiri, Ivi Kaso, Ledina Mandija, Lorenc Luka, Luan Baçi, Mimoza Hajdarmataj, Oerd Bylykbashi dhe Tritan Shehu.
Dhuna që shpërtheu të shtunën në selinë e PD-së është kulminimi i përplasjes midis liderit aktual Lulzim Basha dhe ish-kryeministrit Sali Berisha për lidershipin e partisë, konflikt i cili shpërtheu pas shpalljes së Berishës ‘non-grata' nga Shtetet e Bashkuara të Amerikës dhe largimit të tij nga grupi parlamentar i PD-së me urdhër të Bashës.
Duke e cilësuar protestën e 8 janarit një “sulm të dhunshëm dhe të parapërgatitur” që vuri në rrezik jetën e drejtuesve dhe anëtarëve të saj, kryesia e drejtuar nga Basha u kujton të pezulluarve se ky është “shansi i fundit” për ta që të jenë anëtarë të PD-së.
Disa prej deputetëve që e kanë parë veten në këtë listë e kanë cilësuar vendimin pa vlerë, duke mos e njohur legjitimitetin e organeve drejtuese të PD-së.