Përplasja e demokratëve për drejtimin e partisë ëshë zhvendosur në sallën e e Kuvendit gjatë seancës së parë parlamentare për këtë vit. Kryetarja e Kuvendit Lindita Nikolla njoftoi ndryshimet në përbërjen e Grupit Parlamentar të Partisë Demokratike dhe në komisionet parlamentare sipas kërkesës së dorëzuar të hënën nga kryesia e këtij grupi.
Ajo njoftoi se kryetari i ri i do të jetë Enkelejd Alibeaj dhe se deputetët Albana Vokshi, Luan Baçi, Edmond Spaho dhe Flamur Noka përjashtoheshin nga grupi demokrat. Po ashtu ajo njoftoi zëvendësimin e disa deputetëve që njihen si kundërshtarë të kryetarit të partisë, Lulzim Basha, nga detyrat që mbanin në drejtimin e komisioneve parlamentare e këshillat e përhershëm.
Akti i kryeparlamentares u kundërshtua nga deputetët anti-Basha si i paligjshëm dhe si pozicionim në punët e brendshme të një partie politike.
Me anë të një letre dërguar po të hënën në zyrën e saj, e firmosur nga disa deputetë nga “Komisioni i Përkohshëm i Rithemelimit të PD-së”, ata i kërkuan Nikollës që të mos merrte parasysh vendimarrjet partiake pasi ishin në kundërshtim me rregulloren e Kuvendit dhe vendosnin një “precedent të rrezikshëm për jetën parlamentare”.
Deputeti Oerd Bylykbashi citoi Kushtetutën dhe rregulloren e Kuvendit për të kundërshtuar “përjashtimin” nga një grup parlamentar si koncept ligjor. “Ne jemi deputetë të Republikës së Shqipërisë dhe Kushtetua përcakton që mandati ynë është i pakushtëzuar. Deputetët e formojnë grupin parlamentar dhe jo partitë. Grupet parlamentare formohen mbi bazën e rezultateve të deklaruara nga KQZ, i cili ka emër për emër përbërjen e grupit parlamentar. As ju dhe as ky Kuvend nuk e ndryshon dot”- tha ai gjatë seancës.
Sipas Bylykbashit e vetmja mundësi që i jep rregullorja e Kuvendit është largimi me dëshirën e vet i deputetëve nga një grup parlamentar, ku është zgjedhur. Ai i kërkoi Nikollës dhe mazhorancës që të tërhiqen nga kjo procedurë. “Përndryshe këtu në parlament vendoset një precedent i rrezikshëm që cënon përfaqësimin”, theksoi Bylykbashi.
Kryetarja e Kuvendit u përgjigj se po zbatonte rregulloren dhe vendimarrjen e grupit parlamentar të PD-së dhe se nuk interpretonte vendimmarrjet politike.
Por deputeti demokrat Flamur Noka e akuzoi se po i shërbente interesave të palës tjetër në përplasjen brenda PD-së. “Mendoni se do ta fusni në thes opozitën”- i tha ai, duke i kërkuar që të njihte si autoritet përfaqësues të PD-së vetëm Komisionin e Përkohshëm të Rithemelimit, një organ i dalë nga Kuvendi i 11 dhjetorit, i cili u mbajt nga ish-kryeministri Sali Berisha dhe mbështetësit e tij brenda partisë.
Vendimin e Nikollës e mbështeti kryetari i grupit parlamentar të Partisë Socialiste, Taulant Balla, duke argumentuar se përjashtimi i deputetëve nga një grup parlamentar është e drejta eskluzive e vetë grupit dhe mbështetet në rregullore. “Me vendim të grupit të PD-së është përjashtuar Spartak Ngjela dhe Gilman Bakalli”- tha ai duke sjellë shembuj të hershëm. Ndërkohë që u kërkoi kolegëve demokratë që të sqaronin konceptimin e “pezullimit” të deputetëve të tjerë pasi nuk ekzistonte në rregullore duke iu referuar një vendimi të kryesisë së PD-së për pezullimin e disa deputetëve të tjerë.
Përjashtimet nga grupi parlamentar erdhi si hakmarrje e Bashës për deputetët që u rrjeshtuan në krah të ish-kryetarit Berisha dhe që drejtuan një protestë kundër tij më 8 janar, protestë që përfundoi në përplasje të dhunshme mes demokratëve për marrjen e selisë së kësaj partie.