Lulzim Dedgjonaj ndjejet me fat. Familja e tij pret të zhvendoset në një apartament të ri me tre dhoma në lagjen e re të ndërtuar nga qeveria turke në Laç.
“Banesat janë shpërndarë që prej fundit të vitit që lam pas, por ende nuk na kanë dhënë çelesat,” tha Dedgjonaj, i cili fajëson për vonesën procedurat mes Entit Kombëtar të Banesave dhe bashkisë së Kurbinit.
“Do bëjnë plotësimin e dokumentacionit dhe sëshpejti na kanë thënë se do na japin çelesat e shtëpive, por një datë nuk na kanë caktuar ende,” shtoi ai.
Asnjë nga 522 familjet që përfitojnë nga banesat e ndërtuara me financim të qeverisë turke, nuk kanë hyre ende në shtëpitë që i presin prej më shumë se dy vitesh. Ata shprehen të kënaqur për investimin e kryer, ndërsa e cilësojnë atë si lagjen më të bukur në Shqipëri.
“Unë jam shumë i kënaqur sepse më takoj shtëpia ku ma ka dashur zemra,” thotë një tjetër banor i pastrehë i Laçit. “Dua të falenderoj shumë Erdoganin për këtë investim serioz dhe kaq të bukur që ka bërë këtu në Laç,” shtoi ai.
Bashkia e Kurbinit ishte një ndër zonat më të prekura nga tërmetit i 26-nëntorit të vitit 2019, duke lënë të pastrehë rreth 2 mijë familje. Deri tani ka përfunduar ndërtimi i vetëm 522 apartamenteve me financim të qeverisë Turke.
Bashkia e Kurbinit bën me dije se shpërndarja e këtyre apartamenteve është bërë që prej fundit të vitit 2021 dhe brenda këtij muaj banorët do të marrin çelesat e shtëpive të reja.
Por kur kanë kaluar më shumë se dy vite nga tërmeti shkatërrimtar, në Kurbin ka ende shumë familje të pastreha që ende nuk dinë se çfarë do bëhët me shtëpitë e tyre. Ata apelojnë për ndihmë, pasi situata që po kalojnë është shumë e vështirë.
“Prej 12 muajsh më ka dalë shtëpi për prishje, por akoma nuk ka ardhur njeri,” tha Marte Lleshi, njëra prej banoreve të pastreha të Kurbinit.
“Vi në bashki, interesohem e më thonë do vim sot e do vimë neser. Se kur do vinë unë s’po di,” u ankua ajo.
Marta prej 2 vitesh jeton me qira në Lezhë. Ajo merr një bonus qiraje prej 12 mijë lekë, por çmimet e banesave janë rritur dhe paguan 20 mijë lekë në muaj për qiranë e apartamentit.
“Unë 80 mijë lekë e kam pension dhe asnjë të ardhur tjeter,” tha Marta.
“Jemi në një situatë shumë të vështire dhe i bëj thirrje shtetit që të mendoj dhe për ne që kemi ngelur rrugash që prej tërmetit,” përfundoi ajo.