Një hetim i koordinuar nga Eurojust (AJA) kundër katër grupeve të strukturuara të trafikut të qenieve njerëzore mes Italisë Greqisë dhe Shqipërisë, u përmbyll të mërkurën me arrestimin e 47 personave, nga të cilët 25 vetëm në Shqipëri.
Në një njoftim të SPAK që drejtoi hetimet për palën shqiptare bëhet me dije se grupet që vepronin në Turqi, Greqi, Shqipëri dhe Itali kishin trafikuar 1120 persona, kryesisht emigrantë nga vende të Lindjes së Mesme.
“Operacioni është zhvilluar njëkohësisht në tri shtetet pjesë të skuadrës dhe në disa shtete të tjera”, njoftoi SPAK. Sipas Prokuorisë së Posaccmë gjatë hetimeve të kryera nga Skuadra e Përbashkët Hetimore (JIT) është dokumentuar se pjesëtaret e 4 grupeve kriminale ushtronin në bashkëpunim aktivitetin.
Nga hetimi rezultoi se 2 grupe vepronin në në Itali, 1 grup në Shqipëri dhe 1 grup në Turqi. “Pjesëtarët e këtyre grupeve kriminale pasi siguronin persona të ndryshëm kryesisht në Irak, Siri, Egjipt e vende të tjera kundrejt një shpërblimi monetar nga 5 000 deri në 10 000 Euro, i kontrabandonin ato në rrugë tokësore dhe detare, duke ju mundësuar kalimin në mënyrë të paligjshme nga njëri shtet në tjetrin me destinacion përfundimtar vendet e BE-së”, thuhet në njoftim.
Policia e Shtetit bëri me dije se në Shqipëri operacioni ishte zhvilluar në Tiranë, Korçë, Gjirokastër, Elbasan, Fier, Vlorë dhe Sarandë dhe se ishin arrestuar në flagrancë edhe personat e kontrabanduar për të kaluar kufijtë shtetërorë në mënyrë të paligjshme. Policia tha se kishte kryer arrestimin e 25 personave, si pjesë e një grupi të strukturuar kriminal, nga të cilët 18 janë shtetas shqiptarë dhe 7 shtetas të huaj (palestinez, irakian, iranianë, egjiptianë dhe turq).
SPAK vlerësoi përfundimin e aksionit dhe skuadrën e përbashkët të hetuesve. “Hetimet e kryera nga kjo Skuadër e Përbashkët Hetimore (JIT) kanë konfirmuar dhe një herë faktin se vetëm një bashkëpunim i ngushtë ndërmjet autoriteteve gjyqësore dhe ligjzbatuese të shteteve të ndryshme mund të garantojë sukses dhe efektivitet në luftë kundër krimit të organizuar ndërkombëtar”, thuhet në njoftimin e SPAK.
Në një konferencë të përbashkët për shtyp mes autoriteteve të policisë dhe prokurorisë italiane dhe asaj shqiptare u bë me dije se hetimet për grupin kishin filluar pas një episodi trafiku në prill të vitit 2020. Atëherë Policia e Shtetit raportoi arrestimin e 2 personave që u akuzuan se kishin vjedhur një gomone në Greqi. Sipas një njoftimi të Policisë së Shtetit, gomonia ishte e vjedhur në Greqi dhe dy të arrestuarit Paulin Koçi, 25 vjeç, dhe Dushan Spahiu, 43 vjeç, u referuan në Prokurori për akuzën e “trafikut të mjeteve motorike”.
Por në një njoftim paralel Ministria e Mbrojtjes, e cila ishte bërë pjesë e aksionit përmes Rojes Bregdetare e cila kishte bllokuar gomonen, raportoi se të arrestuarit dyshoheshin për trafik klandestinësh. Ministria e Mbrojtjes e fshiu më pas këtë njoftim duke pretenduar se bëhej fjalë për lapsus.
Prej vitit 2018, fluksi i emigrantëve të parregullt të ndaluar në Shqipëri është rritur në mënyrë eksponenciale, duke e kthyer vendin në një korridor të rëndësishëm të lëvizjes së emigrantë drejt vendeve të BE-së. Referuar të dhënave të Ministrisë së Brendshme, në Shqipëri për 10 muajt e vitit 2021 janë shënuar 14,013 emigrantë të huaj të parregullt. Përgjatë periudhës Tetor 2017-2021 numri mesatar i emigrantëve të huaj të parregullt të kapur në vend është 1,272 persona.