Gjykata e Lartë njoftoi të mërkurën se e ka të pamundur të thërrasë mbledhjen e posaçme për procedurën e zgjedhjes së anëtarëve të Gjykatës Kushtetuese, pasi nuk plotëson kuorumin e nevojshëm. Si shkak për pamundësinë e mbledhjes së posaçme evidentohet vonesa e Këshillit të Lartë Gjyqësor, KLGJ në zgjedhjen e anëtarit të 10-të të Gjykatës së Lartë, që aktualisht përbëhet nga 9 gjyqtarë nga 19 që duhet të ketë.
Në njoftim sqarohet se Kushtetuta e ngarkon Gjykatën e Lartë të zgjedhë tre anëtarët e Gjykatës Kushtetuese. Ndërkohë që Këshilli i Emërimeve në Drejtësi, KED ka miratuar listën e katër kandidatëve për vendin vakant të ish-gjyqtarit të Gjykatës Kushtetuese, Fatmir Hoxha dhe i ka dërguar Gjykatës së Lartë dhe gjithë dokumentacionin shoqërues, kjo e fundit thekson se e ka të pamundur të vijojë procedurën.
Kryetari në detyrë i Gjykatës së Lartë, Sokol Sadushi ka thirrur mbledhjen e përgjithshme të Gjyqtarëve të Gjykatës së Lartë ku është konstatuar kjo pamundësi dhe i është kërkuar KLGJ-së që të ushtrojë kompetencat e saj për të zgjedhur anëtarin e 10-të.
“[…]Në kushtet kur, Gjykata e Lartë ka në përbërje të saj 9 gjyqtarë nga numri i përgjithshëm prej 19 gjyqtarësh, ndërkohë që sipas ligjit nevojiten të paktën 10 gjyqtarë për të konsideruar të vlefshme mbledhjen e posaçme për zgjedhjen e gjyqtarëve të Gjykatës Kushtetuese, […] mbeten në pritje të plotësimit pa vonesë nga Këshilli i Lartë Gjyqësor të numrit të nevojshëm të gjyqtarëve të Gjykatës së Lartë”, citohet në njoftim.
Këshilli i Lartë Gjyqësor nuk iu përgjigj pyetjes për koment që BIRN i drejtoi lidhur me këtë kosntatim të Gjykatës së Lartë, deri në publikimin e këtij shkrimi.
Për vendin vakant të ish-gjyqtarit Fatmir Hoxha në Gjykatën Kushtetuese, kanë aplikuar katër kandidatë, Albert Demirneli, Alket Jaupi, Ervin Karamuco dhe Sandër Beci. KED po kryen procedurat edhe për plotësimin e dy vendeve vakante të tjera, të gjyqtares Vitore Tusha dhe ish-gjyqtarit Gani Dizdari.
Gjykata e Lartë njoftoi më 23 dhjetor 2021 se procedura për vendin vakant të Tushes u pezullua pasi numri i kandidaturave ra nën tre. Ndërkohë, vendin vacant të Dizdarit kanë aplikuar pesë kandidatë, Brunilda Kadi, Ilir Toska, Holta Zaçaj, Manjola Xhaxho dhe Tartar Bazaj.
