Gjykata e Lezhës caktoi masë sigurie me burg për 17-vjeçarin Florian Përvathi, i cili akuzohet se vrau për gjakmarrje bashkëfshatarin e tij Lek Lekgjonaj. Seanca për masën e sigurisë u zhvillua të enjten dhe zgjati rreth 60 minuta.
Pasi dëgjoi palët gjyqtari Artan Hajredinaj, pranoi kërkesën e prokurorit Sabri Kastrati dhe vendosi masën e sigurisë “arrest në burg” për 17-vjeçarin Përvathi. Ndaj adoleshentit janë ngritur tre akuza “Vrasja për gjakmarrje”, “Mbajtje pa leje e armëve dhe municioneve luftarake” dhe “Prodhimi dhe mbajtja pa leje e armeve te gjuetisë dhe sportive”.
Të pranishmit në seancë thanë se adoleshenti është shfaqur në gjendje të rënduar psikologjike dhe nuk ka folur. Avokati i të miturit Andi Duraj, tha për mediat pasi doli nga gjykata tha se ngjarja në të cilën është përfshirë klienti i tij ka dy viktima dhe fajësoi edhe shoqërinë për nxitje të urrejtjes te i riu.
“Është rasti i parë që ka dy viktima. Nga pak të gjithë e kemi nxitur të kryejë kështu lloj krimesh, si gjakmarrja, qoftë media, qoftë opinioni shoqëror që është rritur me një urrejtje të tillë”, tha avokati.
17-vjeçari Florian Përvathi akuzohet se vrau të hënën me armë zjarri fqinjin e tij Lek Lekgjonaj. Viktima ishte vëllai i Ndue Lekgjonaj, i dënuar për vrasjen e babait të Përvathit në vitin 2009, kur i akuzuari si autor ishte vetëm 4 vjeç. Përvathi, bazuar në akuzë, rrezikon dënim me mbi 30 vjet burgim.
