Ditët e ftohta të Janarit kanë qenë edhe më të acarta për familjet në pamundësi ekonomike. Në një prej fshatrave të Fierit, një e moshuar 67-vjeçare, Liliana Sema, u gjet e vdekur ditën e enjte nga familjarët në banesën e saj pa kushtet minimale të jetesës.
Familjarët dhe disa prej banorëve të fshatit akuzojnë Operatorin e Shpërndarjes së Energjisë Elektrike (OSHEE) për ndërprerjen e energjisë elektrike, gjë e cila e la të ndjerën pa ngrohje në ditët më të ftohta të dimrit, duke ngrirë për vdekje.
“Ja prenë dritat, unë e gjeta të ngrirë. Doktori tha ka ngrirë nga i ftohti”, u shpreh vëllai i Lilianës në një intervistë për mediat në Fier, i cili e gjeti motrën të vdekur pasi kishte shkuar për ta vizituar.
”Mblidhte kanaçe, ka pasur një pension 70 mijë lekësh”, pohoi nga ana tjetër djali i saj i cili punonte roje në Sarandë.
“Ajo i ka paguar dritat me pensionin, ata thonë nuk I ka paguar”, vijoi ai.
Drejtori i OSHEE në Fier, në një deklaratë për mediat theksoi se kontrata e zonjës Sema ishte debitore dhe energjia ishte ndërprerë para 1 viti, pa asnjë kërkesë për rilidhje të energjisë.
Komisioneri për Mbrojtjen nga Diskriminimi, Robert Gajda, ka reaguar në lidhje me këtë rast duke e cilësuar si diskriminim mosfurnizimin me energji elektrike të familjeve të varfëra.
“Mosgarantimi i energjisë elektrike për personat dhe familjet e pamundura ekonomikisht cënon dinjitetin e tyre duke i mohuar të drejtën për shëndet, të drejtën për strehim, të drejtën për arsim, të drejtën për informim, të drejtën për të qenë qytetarë me të drejta të barabarta”, shkruan Gajda në deklaratë për mediat.
Në lidhje me raste të ngjashme me të Lilianës, komisioneri Gajda i ka bërë thirrje Këshillit të Ministrave të miratojë sa më shpejtë “Statusin e Klientit në Nevojë”, si një e drejtë tashmë e njohur me ligj.
Gajda gjithashtu i ka bërë thirrje OSHEE-së të mos ndërpresë në asnjë moment furnizimin me energji elektrike për familjet në pamundësi ekonomike.