Ish-ministri i Brendshëm, Saimir Tahiri u transportua nga salla e gjyqit drejt qelive të paraburgimit 313 mbrëmjen e së premtes, pasi Gjykata e Apelit kundër Korrupsionit dhe Krimit të Organizuar e shpalli atë fajtor dhe e dënoi me 3 vite e katër muaj burg për veprën penale të “shpërdorimit të detyrës”.
Vendimi u shpall nga gjyqtari Engert Pëllumbi i Gjykatës së Posaçme kundër Korrupsionit dhe Krimit të Organizuar.
“Gjykata ka konkluduar se i pandehuri Saimir Tahiri provohet tej çdo dyshimi të arsyeshëm se ka përfituar nga Moisi Habilaj dhe Artan Habilaj shërbime dhe përfitime të padrejta dhe se njëkohësisht shpërdorimi i detyrës ka dëmtuar interesat e ligjshëm të shtetit,” deklaroi gjyqtari Pëllumbi.
Apeli e rrëzoi pezullimin e dënimit për Tahirin, duke e konsideruar atë të pabazuar.
Ministër i Brendshëm gjatë mandatit të parë të qeverisë “Rama”, Saimir Tahiri u vu nën shënjestrën e organeve të drejtësisë në tetor të vitit 2017, pasi autoritetet italiane goditën një grup të strukturuar kriminal në trafikun e marijuanës, që drejtohej nga vëllezërit Habilaj – të afërm të Tahirit.
Prokuroria e akuzoi Tahirin për trafik të narkotikëve dhe kërkoi arrestimin e tij, por shumica parlamentare socialiste e bllokoi kërkesën për arrestim dhe e sulmoi hetimin e prokurorisë si të njëanshëm.
Në shtator 2019, Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, por u dënua nga Gjykata e Krimeve të Rënda me 5 vjet burg për shpërdorim detyre, dënim i cili u konvertua me 3.4 vjet për shkak të gjykimit të shkurtuar.
Vendimi u kontestua në Apel dhe në Gjykatën e Lartë dhe pas rikthimit për shqyrtim prodhoi sërish të njëjtin rezultat.
Të premten, vendimi ishte paralajmëruar në orën 13:00, por u shpall katër orë më vonë. Kryesuesi i trupit gjykues, Engert Pëllumbi kërkoi ndjesë për vonesën, duke e justifikuar atë me ‘kompleksitetin e çështjes'.
Ministri Tahiri e priti vendimin fillimisht në sallën e gjyqit dhe më pas në korridorin e Gjykatës së Posaçme, ku e shpenzoi kohën duke biseduar me avokatët dhe komunikuar në telefon.
I deklaruar i pafajshëm përgjatë betejës 5-vjeçare me drejtësinë, Tahiri e cilësoi vendimin e gjykatës si padrejtësi.
“Më vjen keq që shkoi kështu. Jam moralisht i qetë, nuk kam shkelur kurrë ligjin, kam dashuruar çdo ditë të punës sime, jam i lumtur që kam bërë detyrën siç më mirë munda,” shkroi ai përmes një statusi në faqen e tij në Facebook.
Procesi i dytë
Megjithëse prokurorët e çështjes, Dritan Prençi dhe Vladimir Mara u qëndruan akuzave për trafik narkotikësh dhe grup i strukturuar kriminal, trupi gjykues i kryesuar nga Engert Pëllumbi, me anëtarë Igerta Hysin dhe Florian Kalaja, vendosi të lërë në fuqi vendimin e shtatorit 2019 të ish-Gjykatës së Shkallës së Parë për Krime të Rënda, që e dënoi Tahirin me 5 vjet heqje lirie për shpërdorim detyre, që për shkak të gjykimit të shkurtuar u reduktua me 3.4 vjet. Ndryshe nga vendimi i mëparshëm, pezullimi i dënimit për Tahirin u cilësua i pabazuar.
Gjatë shpalljes së vendimit, u renditën si fakte në dëm të Tahirit edhe bashkëpunimi në një shkallë të lartë të një numri punonjësish policisë së shtetit dhe agjencive të tjera ligjzbatuese të anëtarëve të grupit të Habilajve; suksesin dhe vazhdimësinë e aktivitetit kriminal në fushën e narkotikëve; si dhe shkallën e lartë të përhapjes së këtij fenomenti në atë periudhë. “…Gjë që në vlerësimin e gjykatës krijon lidhjen e drejtpërdrejtë të mosveprimit në mënyrë të paligjshme të autoritete shtetërore dhe pasojat kriminale të ardhura,” argumentoi gjyqtari.
Vendimi thotë po ashtu se nuk janë marrë masat e duhura për t'i dhënë eficensë të plotë strukturave më të lartë drejtuese të drejtorisë vendore të policisë Vlorë për parandalimin dhe zbulimin e këtyre veprave penale të evidentuara.
“Në ngarkim të Saimir Tahirit rezulton lidhje e qëndrueshme në kohë dhe e dokumentuar me prova me të pandehurit me procedim të lidhur, Moisi Habilaj dhe Artan Habilaj,” deklaroi gjyqtari gjatë shpalljes së vendimit të shkurtuar.
“Lidhje të tilla të pashpjegueshme… kanë krijuar premisë më të favorshme për infiltrimin e grupit kriminal në radhët e punonjësve të policisë dhe të shtetit me pasojë të drejtpërdrejtë vështirësi dhe pengesa në drejtim të parandalimit dhe luftimit të veprimtarisë kriminale,” shtoi gjyqtari, ndërsa theksoi se Tahiri ka pasur përfitime të drejtpërdrejta nga këto lidhje.
Po ashtu, u deklarua fajtor për shpërdorim detyre edhe i pandehuri tjetër, Jaeld Çela, pasi është konkluduar se kur ai drejtonte policinë e Vlorës është konstatuar një përfshirje e lartë e vartësve të tij dhe funksionarëve të tjerë shtetërore në episodin e trafikimit të 880 kg cannabis sattiva me peshkarexhën “Fatima” në datat 5 dhe 6 maj të vitit 2015.
“Është evidentuar një shkallë mjaft e lartë e kultivimit të bimëve narkotike cannabis sattiva në territorin e Drejtorisë së Policisë Vlorë, aktivitetet këto të paligjshme, furnizuese të drejtëpërdrejta të lidhura me trafikimin e lëndëve narkotike”, konstaton gjykata dhe shton se në të nëjtën periudhë i pandehuri ka mbajtur lidhje me trafikantët, si dhe nuk ka marrë masat e duhura për ti parandaluar dhe zbuluar këto vepra penale.
