Kolegji i Posaçëm i Apelimit dëgjoi të enjten dy kërkesa të reja paraprake nga prokurori i Krujës Bujar Memia, i cili ka ankimuar në KPA shkarkimin prej Këshillit të Lartë të Prokurorisë, KLP dhe procedimin disiplinorë nga Inspektori i Lartë i Drejtësisë, ILD.
Trupa që po gjykon rastin përbëhet nga 6 anëtarë të Kolegjit, përveç gjyqtarit Ardian Hajdari i pezulluar nga detyra.
Memia dhe avokati i tij i kërkuan trupës të shprehej mbi gjykatën kompetente, duke iu referuar një ankimi që Inspektori i Lartë i Drejtësisë kishte bërë në Gjykatën Administrative ndaj një vendimi të Këshillit të Lartë të Prokurorisë.
Së dyti Memia tha se ILD nuk mund të përfaqësohej në seancë me delegim dhe se si përfaqësues i institucionit aty do duhej të ishte vetë inspektori Artur Metani.
Përfaqësuesit e Këshillit të Lartë të Prokurorisë kundërshtuan kërkesën e parë, duke iu referuar kushtetutës që përcakton KPA si organ në të cilin shqyrtohen ankimet për masat disiplinore.
Njëlloj edhe dy përfaqësueset e ILD-së pretenduan se ishin legjitime në proces.
Kolegji pasi u tërhoq për vendim njoftoi rrëzimin e kërkesës së parë dhe bëri me dije se do merrte kohë për të vendosur mbi kërkesën e dytë. Seanca e radhës u caktua të premten në orën 11.00.
Këshilli i Lartë Prokurorisë e shkarkoi në 31 mars 2021 nga detyra të prokurorin Bujar Memia, pas kërkesës së Inspektorit të Lartë të Drejtësisë, për shkak të qëndrimit të tij pasiv ndaj vendimeve të gjykatës për lirimin me kusht të dënuarve për vepra të rënda penale, Ilir Paja dhe Hekuran Billa. Ky i fundit u ekzekutua pak kohë pas lirimit, më 11 qershor të 2020-ës.