Ukraina i ka kërkuar gjykatës më të lartë të OKB-së, Gjykatës Ndërkombëtare të Drejtësisë, që të fillojë procedurat kundër Rusisë, duke akuzuar Moskën për interpretim të rremë të Konventës së vitit 1948 për Parandalimin dhe Ndëshkimin e Krimit të Gjenocidit, në mënyrë që të mbështesë argumentet e saj për një pushtim.
Ukraina argumentoi se “Federata Ruse ka pretenduar në mënyrë të rreme se në rajonet Luhansk dhe Donetsk të Ukrainës kanë ndodhur akte gjenocidi, dhe mbi këtë bazë ka njohur të ashtuquajturën ‘Republika Popullore e Donetskut’ dhe ‘Republika Popullore e Luhanskut’, dhe më pas deklaroi dhe zbatoi një ‘operacion special ushtarak’ kundër Ukrainës”, thuhet në një deklaratë për shtyp të lëshuar nga GJND-ja në Hagë të dielën.
Autoritetet e Kievit thanë se ata nisën çështjen për të “përcaktuar se Rusia nuk ka bazë ligjore për të ndërmarrë veprime në dhe kundër Ukrainës me qëllim parandalimin dhe ndëshkimin e çdo gjenocidi të hamendësuar”, sipas GJND-së.
Kërkesa e Ukrainës drejtuar GJND-së i përshkroi pretendimet e Moskës si “një gënjeshtër absurde” dhe i bëri thirrje gjykatës së Hagës që të zhvillojë një seancë sa më shpejt të jetë e mundur këtë javë.
“Kjo gjykatë duhet të mbrojë urgjentisht Ukrainën në pritje të zgjidhjes së kësaj mosmarrëveshjeje. Ukraina aktualisht po përballet me sulme ushtarake katastrofike dhe tërësisht të paprovokuara dhe çdo ditë që këto veprime vazhdojnë, të drejtat e njeriut të popullit ukrainas shkelen rëndë”, argumentoi ajo.
Duke njoftuar nisjen e çështjes kundër Rusisë të dielën, presidenti ukrainas Volodymyr Zelensky i kërkoi GJND-së të merrte “një vendim urgjent duke urdhëruar Rusinë të ndërpresë aktivitetin ushtarak tani”.
“Rusia duhet të mbahet përgjegjëse për manipulimin e nocionit të gjenocidit për të justifikuar agresionin”, shkroi Zelensky në Twitter.
Rusia nisi pushtimin e saj të Ukrainës javën e kaluar, duke pretenduar se rusisht folësit në rajonet e Luhanskut dhe Donetsk në lindje të vendit ishin nën kërcënim dhe duke thënë ajo duhet të “çmilitarizonte” vendin, i cili vitet e fundit ka marrë një qëndrim pro-perëndimor.
Pushtimi rus është dënuar gjerësisht si një shkelje e ligjit ndërkombëtar.
Pushtimi erdhi pasi Moska njohu të ashtuquajturat Republikë Popullore të Donetskut dhe Republikën Popullore të Luhanskut, dy territore të vetëshpallura, të mbështetura nga Rusia, të cilat kanë luftuar kundër qeverisë së Kievit që nga viti 2014, si shtete të pavarura, duke shkaktuar një protestë ndërkombëtare.
