Mbi 650 mijë qytetarë të bashkive Shkodër, Durrës, Lushnje, Dibër, Rrogozhinë e Vorë do të votojnë sot për të plotësuar vendet vakante në krye të këtyre bashkive. Zgjedhjet e pjesshme të 6 marsit u njoftuan nga Presidenti Ilir Meta menjëherë pasi Gjykata Kushtetuese vendosi se zgjedhjet lokale të bojkotuara nga opozita në vitin 2019 nuk kishin shkelur kushtetutën.
Kjo i hapi mundësinë plotësimit të vakancave në krye të bashkive. Disa prej vakancave si ajo e Shkodrës dhe e Vorës u krijuan për shkak të largimit të fituesve Valdrin Pjetri dhe Agim Kajmaku nga ligji i dekriminalizimit menjëherë pas zgjedhjeve në vitin 2019. Pjetri nuk e mori asnjëherë detyrën e kryebashkiakut të Shkodrës që vijoi të ushtrohej nga Voltana Ademi. Kajmaku u largua pasi u zbulua se nuk kishte thënë të vërtetën në formular pak kohë pasi kishte marrë detyrën në Vorë. Kjo i la të dy bashkitë pa kryetar legjitim prej tre vjetësh.
Edhe Bashkia e Durrësit qeveriset me kryetar bashkie të emëruar që prej dhjetorit të vitit 2019, kur kryebashkiakja Valbona Sako dha dorëheqjen pas tërmetit që shkatërroi një pjesë të mirë të qytetit.
Rrogozhina mbeti pa kryebashkiak në shkurt të vitit 2020 kur kryebashkiaku Haxhi Memolla vdiq nga një infrakt. Vendi vakant në Dibër u krijua pas dorëheqjes së kryetarit Dionis Imeraj, i cili kandidoi për tu zgjedhur si deputet në zgjedhjet e vitit 2021. Imeraj nuk e fitoi vendin e deputetit. Ndërsa bashkia e Lushnjes mbeti pa kryetar pas arrestimit dhe më pas shkarkimit të kryebashkiakut Fatos Tushe i akuzuar nga SPAK për shpërdorim detyre dhe korrupsion.
Tre forca politike, Partia Socialiste, Partia Demokratike dhe koalicioni Shtëpia e Lirisë i krijuar nga LSI dhe një fraksion i Partisë Demokratike të udhëhequr nga ish-kryeministri Berisha, kanë vendosur kandidatë në të 6 bashkitë. Ndërkohë në bashkinë e Dibrës veç këtyre garon edhe Lëvizja e Re.
Durrësi është bashkia më e madhe në garë me 262 mijë zgjedhës të regjistruar sipas KQZ-së. Në Durrës, i cili qeveriset nga socialiastët që prej vitit 2003, garojnë Emiriana Sako kryetare në detyrë për Partinë Socialiste, Luan Hoti për Partinë Demokratike dhe Ardian Muka për koalicionin Shtëpia e Lirisë.
Ndarja e Partisë Demokratike ka krijuar në dukje terrenin për një garë më të hapur në Shkodër, e cila është fituar gjithmonë thellë nga demokratët. Në këtë bashki për socialistët garon Majlinda Angoni, Partia Demokratike ka kandiduar Xhemal Bushatin, ndërsa Shtëpia e Lirisë Bardh Spahinë. Për këto zgjedhje në Shkodër KQZ ka të regjistruar 168 mijë zgjedhës.
Në Dibër, ku janë të regjistruar rreth 56 mijë zgjedhës, gara është mes Rahim Spahiut të socialistëve, Luan Hakës së PD-së dhe Premtim Kryemadhit të Shtëpisë së Lirisë, ndërsa Dritan Torba garon për LRE.
Rreth 104 mijë zgjedhës në Lushnje do të votojnë mes Eriselda Sefës së PS, Indrit Sefës së PD dhe Elton Banos së Shtëpisë së Lirisë.
Në Rrogozhinë për PS garon Edison Memolla, për PD Ferdinand Saraçi dhe Hekuran Xhani garon për Shtëpinë e Lirisë. Bashkia ka 32 mijë zgjedhës të rregjistruar sipas KQZ-së.
Bashkia më e vogël në këto zgjedhje është ajo e Vorës me pak më shumë se 30 mijë zgjedhës të regjistruar. Në Vorë socialistët garojnë me Blerim Shera, demokratët kanë kandidat Ymer Markun dhe Shtëpia e Lirisë garon me Lulzim Vranën.
Fushata për zgjedhjet e pjesshme ka qenë e qetë edhe për shkak të një interesi në dukje të ulët të qytetarëve që nuk shohin se si mandatet një vjeçare të kryebashkiakëve mund të sjellin ndonjë ndryshim.
Ndërkohë reshjet masive të Dëborës kanë penguar procesin në disa qendra votimi në Dibër e Shkodër.
