Socialistët arritën të fitojnë me lehtësi pesë nga gjashtë partitë e vogla në garën elektorale të së dielës, ndërsa opozita e përçarë arriti të mbajë Bashkinë Shkodër në një ditë ku pjesëmarrja në zgjedhje ishte në minimum. Ndërsa janë numëruar rreth tre të katërtat e të gjitha votave, socialistët duket se do të vijojnë të qeverisin bashkitë Durrës, Vorë, Rrogozhinë, Lushnjë dhe Dibër ndërsa kandidati Bardh Spahia i Shtëpisë së Lirisë do të qeverisë Shkodrën.
Socialistët janë në avantazh të thellë duke marrë 60-70% të votave në Dibër, Lushnjë, Rrogozhinë, Durrës dhe Vorë ndërsa Shtëpia e Lirisë, koalicioni joformal mes Sali Berishës dhe Lëvizjes Socialiste për Integrim, u rendit forcë e parë në Shkodër dhe forcë e dytë në katër nga pesë bashkitë e tjera.
Partia Demokratike, e cila përjetoi trazira të konsiderueshme të brendshme pas vendimit për të përjashtuar udhëheqësin e vet të mëparshëm për shkak të shpalljes Non Grata nga qeveria amerikane, rezultoi forcë e dobët në elektorat. Rezultati i saj më i mirë ishte në Rrogozhinë me 22% të votave ndërsa rezultati më i keq në Vorë, ku kandidati i saj Ymer Marku mori vetëm 6.3% të votave.
Surpriza e madhe e zgjedhjeve duket se është Shkodra, ku kandidatja socialiste Majlinda Angoni mori më pak se 40% të votave dhe ku socialistëve nuk i mjaftoi as përçarja e opozitës për të fituar bashkinë më të rëndësishme të veriut, të cilën nuk e kanë qeverisur që nga koha e rënies së regjimit komunist tre dekada më parë.
Socialistët humbën shansin për të qeverisur Shkodrën edhe në zgjedhjet e vitit 2019, në të cilat garuan më vete pas braktisjes së zgjedhjeve nga opozita. Në atë rast, kandidati fitues i PS-së Valdrin Pjetri nuk arriti të marrë mandatin pasi u zbulua se nuk kishte deklaruar një dënim në Itali për trafik droge kur kishte qenë i ri.
Fituesit e zgjedhjeve të së dielës do të qeverisin administratat e bashkive deri vitin e ardhshëm kur pritet të zhvillohen zgjedhjet e zakonshme për pushtetin vendor.
Në garën e së dielës u votua vetëm për postin e kryetarit të bashkisë ndërsa këshillet bashkiake vijojnë sipas rezultateve të zgjedhjeve të vitit 2019, ku socialistët kontrollojnë praktikisht 100% të tyre.
