Qeveria shqiptare duket se doli e fituara e madhe e dallgës së rritjes së çmimeve në tregun ndërkombëtar, duke shtuar arkëtimet tatimore, kryesisht ato që arkëtohen në dogana ndërkohë që të ardhurat e qytetarëve, të para te pagesat e tatimit mbi të ardhurat personale, vijojnë të jenë ndjeshëm më të ulëta se sa në vitin 2019, viti para krizës së shkaktuar nga pandemia COVID-19.
Përgjatë të gjithë vitit 2021, çmimet e mallrave të rëndësishëm të tregtisë ndërkombëtare, përfshirë drithërat dhe karburantet, pësuan një rritje të fortë. Shqipëria importoi gjatë vitit të kaluar 611 mijë tonë karburante, taksimi i të cilave përbën zërin më të madh të të ardhurave të qeverisë.
Ndërsa qytetarët u përballën me rritje të njëpasnjëshme të çmimeve të mallrave më të rëndësishëm, përfshirë rritjen e çmimit të bukës, inflacioni dukshëm u konvertua në të ardhura më të larta për qeverinë.
Të ardhurat e përgjithshme të buxhetit të shtetit arritën në 510 miliardë lekë, (4.25 miliardë euro) gjatë vitit 2021, nga 226 miliardë në vitin 2020 kur ishte edhe kriza e pandemisë dhe 460 miliardë në vitin 2019, viti para pandemisë. Në krahasim me vitin 2019, rritja totale më 2021 është 11%, gjë që, nëse merret parasysh edhe viti i krizës, sjell një rritje mesatare vjetore prej mbi 5%, një rritje mëse e zakonshme për të ardhurat e buxhetit të shtetit. Por gjatë vitit të kaluar, të ardhurat janë rritur në mënyrë kaotike. Të ardhurat nga Tatimi mbi Vlerën e Shtuar u rritën me 22% në krahasim me itin 2019 ndërsa të ardhurat nga Tatimi mbi të Ardhurat Personale (TAP) ranë më 15%. TAP është tatimi që paguajnë qytetarët për të ardhurat e tyre nga pagat apo nga interesat dhe përbën tregues indirekt të nivelit të të ardhurave të përgjithshme të popullsisë. Dukshëm këto të ardhura janë më të ulëta në vitin e dytë të pandemisë nga sa ishin në periudhën para pandemisë. Por ndërsa të ardhurat janë më të dobëta, shpenzimet që qytetarët kanë paguar për taksa e tatime janë rritur.
Buxheti i shtetit shënoi shpenzime prej 596 miliardë lekësh dhe një deficit buxhetor prej 127 miliardë lekësh.
